Lungkawlh khaw mi R.Chhunthangvunga chu ṭiau kamah savawm seh vangin a boral.
Lungkawlh khawtlang hruaitu pakhat sawi dânin R.Chhunthangvunga hi tunkar Thawhṭanni khan an khua aṭanga ṭiau luiah hian balu la turin a fapa nen an riak lut a, Thawhlehni tlai khan amahin chawhmeh zawngin a chhuak a, hetah hian khaw thim hnuah savawm no hruai lai nen innangchingin vanduaina hi a tawk ta niin hriat a ni a, ṭiau luiah hian Lungkawlh khaw mi engemawzat chu balu la-in an riak a, Chhunthangvunga a chetsual hma hian a Torch light êng pawh hmu an awm a, hemi hnu reilo teah êng an hmuhna bawr velah hian Savawm hûk ri an hre chhunzawm leh a, mihring awlrawl erawh an hre lo a, an ngaih ṭhalo chuan helai hmun hi panin, za dar 9 velah Chhunthangvunga ruang hi an han hmu ta niin thulakna chuan a sawi a, a ruang an hmuhna bulah hian savawm note mit la keu lo pahnih hmuh a ni bawk tih thudawnna pakhat chuan a sawi bawk a, a ke lamah hian savawm hian a seh nasa hle a, hetah hian a thisen zam pui a seh chat a, chu chu a thihpui niin a lang.
Nimin khan R.Chhun-thangvunga ruang hi N.Van-laiphai PHC-ah postmortem a ni a, nimin chawhnu lamah khan an vuiliam a ni. R.Chhunthangvunga hi nikum October thla khan Lungkawlh Presbyterian Kohhran Upa atan nemngheh a ni.