Social Welfare Minister Dr. K. Beichhua chuan nimin khan Mara rama Missionary (Lakher Pioneer Mission) te hmunhma leh sulhnute humhalhna tur project, Preservation of Cultural Heritage, Saikao khuaa mi kalpui dan turte official te hruaiin a enfiah a, he project atan hian Ministry of Tribal Affairs atangin Cheng nuai 560 hmuh a ni.

Saikao khawtlangin an lo hmuahnaah thu sawiin, Dr. K.Beichhua chuan Tisa leh Thlarau lama malsawm-na min thlentu, Sap Missionary te hmunhma leh an sulhnu humhalhna tur project sawrkar laipuiin an lo pawmsak chu Saikao khua leh Mara ramin malsawmna kan dawn liau liau a ni. Kum 2020 a Mizoram atanga project an thehluh zingah pahnih chauh Ministry of Tribal Affairs in an lo pawmpui a, chuta pakhat zawk chu a ni, a ti.

Social Welfare Minister Dr K.Beichhua chuan SEDP aṭanga sawrkarin hma a lo lak tawhte tarlangin, SEDP PWD Line Department hnuaiah inkalpawhna kawngpui siamṭhat hna nasa tak thawh tawh a ni, a ti a. Education Department hnuaiah zirtirtu indaihlohna phuhruk nan SEDP kaltlangin zirtirtu ṭhahnem tak lak a ni tawh bawk a ni tiin, Social Welfare Department kaltlangin SEDP Social Rehabilitation Board chuan ruihhlo ngaite enkawlna tur Seṭhawnah Jordan Centre siamṭhat hna pawh thawh zawh tawh a nih thu sawiin, tunah hian ruihhlo ngai enkawl turte admit ṭan tawh a ni, a ti bawk. SEDP kaltlangin Transport Department chuan Aizawl tih loh District khawpui dangah ṭhalai eizawnna nei lote tan Two Wheeler Taxi permit pek an tum thu pawh a sawi lang bawk a ni.

Dr K. Beichhua hi Siaha District Bawrhsap Lalsangliana, L. Khaichyu, MDC, Nahlo Solo, MDC-te bakah Official leh Party mi ṭhahnem takin an ṭawiawm a ni.