Parliament budget session neih mekah Mizoram Rajya Sabha MP K.Vanlalvena chuan nimin khan thu sawiin Mizoram-in FCI aṭanga thlatin buhfai a dawn chu kan state mamawh zat chanve chauh a nih thu sawiin, a zatve dang chu open market aṭanga Mizoram sawrkarin man to zawka a lei a ngaih thu a sawi a, FCI aṭanga kan buhfai dawn zat tipung turin central sawrkar a ngen.
K.Vanlalvena chuan North Eastern State hrang hranga FCI structure chu siam danglam a ṭul thu sawiin, state 4 – Assam, Arunachal, Nagaland leh Manipur ten anmahni state-ah ṭheuh FCI Regional office an neih laiin state dang 3 – Mizoram,Tripura leh Meghalaya-ten NEF hnuaiah office pakhat Shillong-a mi an inṭawm chu a dik lo a ni, a ti a, heng state pathumte hian a hrang ṭheuha mahni state-ah FCI Regional office neih a ṭul tih a sawi bawk.
Nimina Parliament session-a K.Vanlalvena thu-sawi ṭan laiin Rajya Sabha Chairman M.Venkaiah Naidu chuan tunhnaia Mizo-ram a rawn tlawh thu leh State Assembly-ah thu a sawi tih tarlangin, Mizoram Legislative Assembly chhunga rorelna kalpui dan chu buaina awm ve ngai lo, ram pum tan entawn tlak a ni, a ti a, K.Vanlalvena chuan Mizoram a rawn tlawh avanga lawmthu hrilhin, lo kal leh ngei tura a beisei thu a sawi bawk a ni.