Mizoram sawrkar chuan buhfaia sawrkar sum hloh nasa lutuk tihziaawmna turin Non-NFSA (National Food Security Act) hnuaia ration card (card var) hmangtuten buhfai an khulna man chu tihsan tumin ruahmanna a nei mek a, tihsânna tur zât erawh bithliah fel a la ni rih lo.

Thulakna tarlan danin, Food Civil Supply & Consumer Affairs (FCS&CA) department chuan tun din-hmuna card vâr/Above poverty line (APL) hmangte hnen a buhfai hralhna kg. ah ₹15 chu tihsan tumin rawtna a nei a, card vâr hmangte khul tur buhfai department-in state pawn aṭanga leina chu kg-ah ₹27.50 a nih laiin, retailer aṭanga an khulna erawh kg.-ah ₹15 a ni.

APL ni lo, scheme dang AAY (card eng), PHH (card hring/pawl) hmanga retailer aṭanga buhfai khulte chu central sawrkarin man tlâwma buhfai an khulna tur (subsidy rate) ruahmanna a siamfel sa vek a, hetihlai hian card vâr hmangte buhfai khultirna man tihsân a nih chuan buhfai leinaa sawrkar sum hlohna tam tak a phuhrûk theih beisei a ni.

Hemi chungchang hi Assembly budget session neih zawh takah khan supply minister K.Lalrinliana pawhin lo sawi tawhin, a rate bithliah kawngah rawtna nei turin member-te a lo sawm tawh bawk a ni.

Thulakna tarlan danin, card var/APL scheme bik hnuaia ration card hmang-tute chungchang chu state sawrkarin mipuite dinhmun thlira a kalpui niin, card vâr hmangtute buhfai khulna tur rate pawh state sawrkarin ruahmanna a siam tur a ni.

FCS&CA chhinchhiah danin, Mizoram a ration card awm mek 2,79,531 zingah NFSA hnuai a AAY (card eng)-ah card 25,751 awmin, chung card a hming chuang zat chu 64,956 an tling a. PHH (card hring/pawl) a card 1,39,832 ah hming 6,01,092 chuangin, Non-NFSA (card var) a ration card 1,13,948 a hming chuang zat chu 4,94,778 an tling a ni.