Governor Hari Babu Kambhampati chuan ṭhalaite zingah sawrkar hnathawh tum tlatna tihnêp a ngai a, entrepreneur huanga an zuan luh duhna tura fuih an ngai a, State hmasawn ni turin ṭhalai tam tak entrepreneur-ah chher tum a ṭul tih a sawi.
Nimina State Bank of India (SBI), Mizoram hotute nen Raj Bhavan-a an inkawmnaah he thu hi sawiin, Governor chuan ṭhalaite entrepreneur huanga an zuanluhna tur atan hian Bank lam pawhin bul ṭanna atana loan ṭha tak tak an neihte an puanzar ṭhat viau a ngai a ni a ti a, kuthna-thawktute leh sumdawngte tana ṭangkai PMMY, PMEGP, KCC, MSME, etc-te pawh mipuiin an la hrechiang lo hle a, heng loan ṭangkai tak takte hi kan state sum thawhchhuah tipung tura kan mamawh em em entrepreneur tam tak an rawn awm theihna atana thil ṭangkai a ni a ti.
Governor chuan Bank tam zawk chuan an customer-te hnenah hamṭhatna awm theite an sawifiah tawk lo ṭhin tih a chiang hle a ni a ti a. Scheme ṭha tak tak PMSBY, PMJJBY, APY, PMJY, SUI, etc aṭanga hamṭhatna Mizoram mipui tam zawkin an dawng lo chu pawi a tih thu sawiin Bank hnathawkte ṭan nasat a la ngai tih a sawi a ni.
Tunah hian SBI, Mizoram chuan Branch 46, CSP 27 leh ATM Booth 106 an nei mek a, Saving Bank leh Current Accounts belhkhawm 3,20,357 an enkawl mek a, December 2021 thleng khan cheng vbc. 5,319.38 an lalut a, cheng vbc. 2,264.26 an puktir thung a ni. December 2021 thleng khan Mizorama Bank hrang hranga sum dahluh zawng zawng zat aṭanga chhut a 39.58% chu SBI in a lalut a; Loan leh thil danga puk chhuahtir zawng zawng zat aṭanga chhut a 33.48% chu an pek chhuak niin, Priority Sector-a pawisa puktir zawng zawng zinga 30.16 % pawh SBI pekchhuah a ni bawk a ni.
Governor leh SBI hotute inkawmnaah hian SBI aiawhin LP Lalchangkima, Regional Manager, Lalnilawmi, Chief Manager & SLBC Coordinator, Lalmawizuala Sailo, Chief Manager leh official dang te an tel a ni.