Union Minister of State for Health & Family Welfare Dr. Bharati Pravin Pawar chuan Mizorama Health Department official-te chu thingtlanga hriselna dinhmun ngai pawimawh zual tur leh, henga inenkawl-na hmun – CHC, PHC leh Sub-Centre-te chu tlawh fo ṭhin turin a chah.
Union Minister hian nimin khan Mizoram Health Minister Dr. R. Lalthangliana chu MINECO Conference Hall-ah a kawm a, hetah hian Dr. Bharati Pravin Pawar chuan presentation hrang hrang a ngaihthlak hnuin National Health Mission hnuaia ECRP Package I leh II-a Mizoramin sum a dawn zât te, 15th Finance Commission hnuaia hriselna atana sum Mizoramin a dawn te, Pradhan Mantri – Ayushman Bharat Health Infrastructure Mission(PM-ABHIM) hnuaia sum dawnte zâwtin, heng hnuaia hmalâk dante pawh a zâwt a, Mizoram Cancer Institute mamawh ṭhenkhatte chu PM-ABHIM hnuaia proposal siama thehlut turin thurawn a pe a, Covid-19 hripui dona kawnga Mizo-ram hmalâkna a hriatte chu ṭha a tih thu a sawi bawk.
Hei bakah hian Union Minister chuan National Family Health Survery thar bera Mizoram dinhmun ṭhenkhat tarlan, a bik takin anaemia tam dan tarlan te, zuk leh hmuam chung-changa Mizoram dinhmun tarlante leh nu naupai leh raipuarte a hun taka inentir kawnga hnufualna nia langte siamṭhat nan ṭan lak theih nise tiin a duh thu a sawi a ni.
Health Minister Dr. R. Lalthangliana chuan Union Minister hnenah hian Mizo-ram mamawhte ziakin a thlen a, Union Minister chu PHC leh CHC-a Ambulance hman mekte chu a hlui tawh avangin Ambulance thar 30 Mizoram pe turin a ngên a, hmarchhak biala state-te chu state dangte nen tehkhinin an hnufum bik thu sawiin, hei vang hian funding pattern leh guidelines-te siamṭhat leh ennawn a ṭul a, chumi atan chuan Hmarchhak Health Minister-te hova, Union Health Minister pawh tel ngeiin, hengte hi sawiho a ṭul nia hriat thute a sawi a ni.
Thil dang a thlen te chu – District thar 3-a District Hospital khum 75 awm ṭheuh theihna sakna tur ngaihtuahsak te; ZMC-ah lung, kal, tha leh thluak lam superspeciality dinna kawnga puihna leh lung lam leh kal lam inenkawlna Aizawl Civil Hospital-a neih mek tihlen belh leh tihchangtlun kawng dappui te; PHC leh Sub Centre sak ṭhatna tur ngaih-tuahsak te; Scheme thar hnuaia ram puma rilru lam enkawlna Mental Hospital 40 din turah Mizoram chu telh ve tura ngenna te; ZMC chu central funding-a enkawl dan ngaihtuahte leh a hnuaia ruhrel mamawh zual din belhna tur sum ngaihtuahsak te a ni a, JICA ṭanpuina hnuaia Mizoram State Cancer Institute tihchangtlunna kalpui mek-te pawh a sawilang bawk.
Meeting-ah hian hriselna kawng hrang hranga Mizo-ram dinhmun tlangpui te, mipuiten hriselna ṭha leh inenkawlna tlâwm an neih theih nana mamawh hrang hrang te, Mizorama Covid-19 dihmun tlangpuite leh Zoram Medical College dinhmun leh mamawhte chu tarlan a ni.
Meeting ah hian Health & Family Welfare Board Vice Chairman leh Covid-19 Medical Operational Team Vice Chairman Dr. ZR Thiamsanga; Tuichawng bialtu MLA Dr. BD Chakma; Chief Secretary Dr. Renu Sharma; H&FW Secretary, Lalramnghaka; H&FW Department hotulute leh ZMC Director leh hotu dangte an tel a ni.