Inrinni zing dar 4:30 vel aṭanga Chin National Army (CNA) kaihhruai tual-chhung mi ralthuam kengte’n Khawmawi bula Myanmar sipai hmun an kah avanga Zokhawthar lama raltlan lo lût zat chu 2,000 aṭanga 3,000 inkar vel an tling tawh.
Zokhawthar khawtlang hruaitute sawi danin raltlan hi an luh belh zel a, mi 1,200 vel chênna Khawmawi khua chu rauhsan a ni tawh a, a khaw ṭhenawm Haimual leh Rihkhawdar aṭangin raltlan tam tham tak an lo lut bawk a. Inrinni aṭanga raltlan lo lutte hi Zokhaw-thar YMA-te chuan an ei leh in tur an lo buatsaih a. Chhungte leh ṭhiante belh mai tur nei lote chu Commerce and Industries kudam leh hmun remchang-ah awm lailawktir an ni.
Inrinni zing inkahnaah hian sipai 5 an thi a, engemawzatin hliam an tuar bawk niin People’s Defense Force (PDF) – Zoland thuchhuah chuan a sawi a, CNA kaihhruai mipui sipai lamah pawh thi awm lo mahse hliam an awm nia sawi a ni.
Nimin zing dar 9 vel khan Haimual lam aṭangin Myanmar sipai 20 vel chu Khawmawi khaw chhungah lûtin silai an hmet puak nual a, anmahni lo bauhtu ui pakhat an kaphlum niin Zokhawthar khawtlang hruaitute chuan an sawi.
Tuna raltlan lo lut thar nen hian Myanmar ram aṭanga Mizorama raltlan lo lut tawh hi mi 26,000 vel nia official lamin an sawi laiin, raltlan lo buaipuitute chuan 30,000 an chuang tawha an rin thu an sawi thung.
Hetih lai hian Champhai district-ah hian raltlan 10,000 chuang an awm nia sawi a ni a, an zinga mi 8,279-te chu an chanchin chhinchhiah a ni tawh a, an zinga mi 8,205 te chu raltlan an ni tih chhinchhiahna identity card pek an ni tawh bawk a ni.