Zothlifim Logo
Loading ...

Ramri-a insum-dawn tawnna tur enfiah Mizoram tlawha lo zin Bangladesh Commerce Minister Tipu Munshi leh Mizoram state sawrkar aiawhin Commerce & Industries Minister Dr R Lalthangliana te’n nimin khan insumdawn tawnna tur chungchangah thuchhuah inṭawm (Joint Statement) an siam.

Secretariat Conference Hall-a ram pahnih palaite’n thuchhuah inṭawm an siam hmaa thu thar thehdarhtute an kawmnaah, Bangladesh Commerce Minister chuan Bangladesh sawrkarin Mizoram nena ramri-a insumdawn tawnna chu a duh tak zet thu leh ṭha taka kalpui tuma ruahmanna an siam thu a sawi a, insum-dawn tawnna mai piah lamah, a mihring chengte inunauna chu an duh ber tih sawiin, an ram chhungah Mizo ṭhahnem tak awmin, Bangladesh leh Mizote hian inkungkaihna thûk tak an nei tih a sawi bawk.

Bangladesh Commerce Minister hian Mizoram aṭangin aieng, sawhthing, hmarcha leh lung chang (stone) te chu lakluh an duh tur thil a nih thu a sawi a. Lung chang bik hi an ramin an neih mang loh thil a nih avangin Bhutan leh Bihar aṭanga an lak luh reng thu leh a hautakin senso a tam hle tih a sawi a, cement leh steel-te bakah thawmhnaw leh plastic lamah pawh Bangladesh-in industry lian tham a neih avangin insum-dawn tawnnaa a tel theih a beisei thu a sawi bawk.

Mizoram leh Bangla-desh insumdawn tawnna tur atana pawimawh Border Haat chungchang pawh sawiin, hmalakna kal mek a nih thu a sawi a. Bangladesh lamah Land Custom Stations (LCS) chu chak taka hmalak mek a nih thu leh, Mizoram lamah pawh Integrated Check Post (ICP) chu tunah hian hmalakna kal mek a niin, a rang lama puitlin thuai a beisei tih a sawi.

Mizoram Commerce & Industries Minister Dr R Lalthangliana pawhin, tun dinhmunah ramria insum-dawntawnna turin Bangla-desh lam chuan Silsuri lamah pawh Mizoram thlengin kawngpui an laih tlang tawh bakah, balck topping pawh tih vek a nih tawh thu a sawi a. Mizoram lamah erawh Pukzing aṭangin kawng awm chu siam fe erawh a ngaih tur thu sawiin, hemi chungchangah chief minister pawh a sawipui tawh thu leh rang taka siam thuai a ngaih tur thu a sawi.

Tlabung leh Kawrpuichhuah inkar kawng pawh hma nasa taka lak a nih thu leh double lane pawh black topping ṭha taka tih fel a nih tawh thu sawi bawkin, Border Trade tihna tur Mizoramin ram a neihah pawh sawrkar laipui aṭanga sum hmuh aṭangin fencing tih a nih tawh thu te, Kawrpui lui (Theka)-ah RCC Double Lane Bridge 660 metres a thui siam tum a nih thu a sawi bawk.

Thuchhuah inṭawm an siam chu:

  1. Silsury leh Sajek-ahte insumdawn tawnna hmun siam tur chungchang hi Bangladesh chuan a lo zirchian hnuah rem a tih chuan sawrkar palai kaltlangin a rawn hriattir ang.
  2. Insumdawn tawnna mumal taka kalpui a nih theih nan Mizoram sawrkar chuan Kawrpuichhuah-Integrated Check Post (ICP) ang chi hi a ral leh lam Thegamukh-ah siam ve turin Bangladesh sawrkar a ngen a. He ngenna hi ziaka an dawn hunah Bangladesh sawrkar chuan a kaih-hnawih ministry bawhzui turin hma a la nghal dawn a ni
  3. Inkalpawhna tihchangtlun Mizoram sawrkarin rawtna a siam chungchangah Bangladesh chuan Chhota Horin leh Thegamukh inkar kawng 17 kma thui siam chungchang hi a lo ngaihtuah zui ang a, a kaihhnawih ministry-ah a lo thlen ang.
  4. Mizoram sawrkarin Khawthlangtuipui (Karnaphuli) lui chu Bangladesh leh India insumdawn tawnna kalkawng atan a rawtna chu, a kaihhnawih Ministry hnenah thehluh a ni ang.
  5. Khawthlang tuipui lei dawh turin Mizoram sawrkar chuan a rawt a, hei hi India commerce ministry aṭanga rawtna mumal zawk la siam tur a ni a, chutiang rawtna a awm hunah Bangladesh chuan an ngaihdan an rawn hriattir ang.
  6. A tu lam ve ve pawh hian insumdawn tawnna tura thil ṭulte siam a, mumal leh awmze nei taka insumdawn tawn hi an duh a ni.