Zothlifim Logo
Loading ...

Zampuimanga Group YMA, Bairabiten an area-ah Burma kuhva ro nia hriat an man chu a rûkin state pawnah phurhchhuah tum a ni a, YMA-ten an ûmzui nghal chungin an man hman lo. Hetihlai hian Aizawl Custom chuan Burma kuhva ro ngei a nihna finfiah turin an phût a, hemi bawhzui hian police lam chuan finfiah turin hma an la mek niin thudawn a ni.

Zampuimanga Group YMA Secretary PB Lalnunmawia chuan kuhva an mante hi d芒n lova sumdawnna a nih a rinawm avangin an man hnuah Bairabi PS-ah FIR an thehlut a, mahse state dangah phurhchhuah tum a nih thu dawngin Inrinni zan lai khan truck ke 12 nei chi-ah kuhva bag ṭhenkhat hi an hlâng hman niin hriat a nih thu a tarlang. YMA-ten ûmzui nghal mahse an hmuh hman hmain phai lamah an tlanpui a, Zophai police checkgate-a duty te pawhin he motor hi a number leh driver hming entry lovin an kaltlangtir niin thudawn a ni.

Zampuimanga Group YMA secretary chuan, “Kolasib SP ngei pawhin khawih chêt tawh loh tura thupek a chhuah tawh sa, a hnuaia police lamin awlsam taka an lo chhuah leh si hi hriatthiam harsa a ti a, hemi kawnga mawhphurtu hi department/sawrkar lamin hma a la lo a nih chuan hotu sang zawkah thlen ngei a ṭul dawn niin kan hria,” tiin YMA-in ram leh hnam tana him lo nia lang sumdawnna a dodalna kawngah dân lova sumdawngte lo pui ṭhin NGO/ zirlai pawl hruaitu awmte chu mualphona nasa zawk a thlen hmaa inthiarfihlim turin an ngen a, Bamboo Industry-a Burma kuhva ro awm mek pawh a rang thei ang bera chingfel turin sawrkar an ngen thu leh chinfel a nih loh chuan Group YMA-in a thiam danin chingfel tura hma an lak dawn thu a tarlang.

Zampuimanga Group YMA hian Bairabi Zophai Bamboo Industry Kudam aṭangin Burma kuhva nia hriat te hi an man a, April 13 khan Bairabi Sub Deputy Commissioner hnenah FIR an thehlut a, SDC hian a thuneihnain a phal loh vangin Bairabi PS-ah April 14 khan FIR hi an thehlut leh a ni. Hetihlai hian Kolasib SP Vanlalfaka Ralte chuan Custom-te hian Burma kuhva ro a nihna finfiahna pe hmasa phawt turin an phut a, a finfiahna a awm loh chuan an chhui theih loh thu an hrilh avangin Burma kuhva ngei a nihna finfiah turin hma an la mek a ni.

-Kolasib Aw