Mizoram sawrkarin dân loa Myanmar aṭanga Mizoram kaltlanga kuhva tawlh rûk vênna tura checkgate a siam, Serchhip dai Sailiamkawn leh Sairangah dân loa tawlh ruk kuhva man a la ni lo a, heng hmun a police duty te chuan dân loa kuhva tawlh ruk a chawl/tawp rih nia a lan thu an sawi.
Sailiamkawn check-gate-a duty-te sawi danin, checkgate hawn a nih aṭanga tun thlengin lirthei an enfiah tawh zingah kuhva rah tawlh ruk man an la nei lo a, khawchhak lam aṭanga bungraw phur lirthei lûtte endik uluk zualin, rinhlelhawm thei ang chi te report an dawng zung zung thin a, anmahni hêla kuhva tawlhru an awm leh awm loh erawh an hriat theih loh thu an sawi.
Sailiamkawn checkgate hi February 17, 2022-ah hawn a ni a, chhun zan zawmin police 4 an duty a, kuhva tawlhruk bakah hian foreign aṭanga dân lo a bungraw lut ang chite pawh duty-te hian an endik ṭhin a ni.
Sairang checkgate lamah pawh tun dinhmunah chhun zan zawmin police 2 zel an duty a, duty bul an ṭan February 14, 2022 aṭanga tun thleng a lirthei ṭhahnemtak an endik tawh aṭangin kuhva tawlh ruk man an la nei lo bawk a, Checkgate duty te chuan state pawn lamah an phurh tlang theih tawh loh avangin tawlh rûk tum an awm vak tawh lo a nih theih thu an sawi a, a lan danah chuan kuhva tawlh ru an la awm a nih pawhin, tunhma lam ai chuan a tlêm tawh thu leh tun dinhmunah chuan a tawp lailawk ni hial a an hmuh thu an sawi bawk a ni.
-Zalen