Skip to content
Home » Chanchinthar » Cheng nuai 459.60 senga siam, Chalrang–New Chalrang tui lakna hawng

Cheng nuai 459.60 senga siam, Chalrang–New Chalrang tui lakna hawng

Nizung chakna hmanga Chalrang leh New Chalrang khuate chawm tura NABARD (RIDF-XXV) sum cheng nuai 459.60 senga siam tuilakna, Chalrang-New Chalrang Water Supply Scheme chu nimin khan PHE Department changtu Deputy Chief Minister Tawnluia’n a hawng.

He Scheme hawngtu Tawnluia chuan thu sawiin, Chalrang leh New Chalrang khaw inṭawm tur tuilakna hawn a ni ta chu ni chhinchhiah tlak bik tak a nih thu leh a lawmpui takzet thu a sawi a. Mipuite chu tuilakna enkawl leh venhim hna Department kuta dah mai lova neitu nihna pu a enkawl turin a fuih a, tuihna siamtu ramngawte humhalha venghim ṭhin turin a chah bawk.

SEDP Executive Board Chairman ni bawk Tawnluia chuan kum 2022-2023 financial year atangin Sawrkar flagship programme SEDP kaltlangin kuthnathawktute tan theihtawp chhuah tum a nih thu sawiin, a thawhkhat nan ₹50,000-a bul ṭan tum niin, chhungkaw 60,000 thlan chhuah hmasak tum a ni, a ti a. MLA bial tinah chhungkaw 1,500 zel thlan phawt tum a ni a, a thlangtu turte chu khua leh district level thlenga siam a nih tur thu a sawi bawk.

He hun hi Veterinary, Fishery and Sericulture Board Vice Chairman C.Lalmuanpuia pawhin a hmanpui a, Chalrang-New Chalrang Water Supply Scheme (Solar pumping) hi July ni 2, 2020 khan bul ṭan niin, April ni 30, 2023 a zawh hman tura tih chu April ni 30, 2021 khan zawhfel a ni a. Tui connection 299, Chalrangah 164 leh New Chalrangah 135 pek chhuah niin, PHED/P&V Eastern Engineers chu Implementing Agency an ni.

Chalrang-New Chalrang Water Supply Scheme hi mi pakhatin nikhatah tui litre 55 zel hmang anga chhutin mi 1567 te kum 30 lo la awm leh tur thleng chawmzo tura duan a ni a. Tui pump chhuahna lui atanga tuidahkhawlna tuizem lian Chalrang khaw lu a awm insanhleihna hi metre 481 a ni a. Nikhatah darkar 7 chhung tui pump thei tur leh nitin tui litre 68,530 pump thei tura duan a ni.

Leave a Reply

This site uses Akismet to reduce spam. Learn how your comment data is processed.