Chief Minister Zoramthanga chuan nimin khan INTACH Mizoram Chapter lehkhabu siam “Built Heritage of Mizoram 2021”, Mizorama building hlui ding lai chanchin ziahna chu CM Conference Hall-ah a tlangzarh.
CM chuan lehkhabu a tlangzarh chu hlu a tih thu sawiin, ṭhangtharte tan pawh ṭangkai tak tur nia a hriat thu a sawi a, kan heritage neih ang angte hi ṭha taka vawn zel chu kan tih ngei tur nia a hriat thu sawiin, sawrkar pawhin a tlin chin ang zelin theihtawp a chhuah zel tur thu a sawi.
CM-in lehkhabu a tlangzarhah hian building hlui 71 tarlan a ni a, chung zinga 17 te chu Assam Rifles enkawl lai mek niin, an awmna chhunga mi an ni a. Buiding 14 chu kohhran hrang hrang PCI, BCM, ECM leh SA-te hnuaia enkawl niin, 27 chu sawrkar building an ni a, a bak 13 te hi mimal ta an ni.
INTACH (MC) Member Secretary Lalram Thanga chuan Archaeological Survey of India-in kum 2010 a kaihhruaina a duan zulzuiin, lehkhabua building hlui an dahte chu kum 1950 hma lam a mi chauh telh a nih thu a sawi a, kum 2014 khan a vawi khat na he ‘listing’ bu hi a vawi khat nan siam a lo ni tawh a ni.
Heng building hlui 71 te hi District paruk (Aizawl, Lunglei, Khawzawl, Kolasib, Serchhip leh Siaha) ami te a ni.