Zothlifim Logo
Loading ...

NABARD (RIDF-XXIV) sum cheng nuai 1261.78 senga Raifan lui aṭanga Nizung chakna hmanga Sialhawk khaw chawmtu tura tuilakna siam, Sialhawk Water Supply Scheme chu nimin chawhnu khan PHE Department changtu Deputy Chief Minister Tawnluia’n khuallian niin a hawng.

Hawnna inkhawmah hia thu sawiin, Tawnluia chuan tui harsatna khua Sialhawkin hnianghnar zawka tui an dawn theih nana tuilakna thar hawn a ni ta chu lawmawm a tih thu leh a khaw mipuite a lawmpui takzet thu a sawi.

Tawnluia chuan sawrkar laipui duh dan angin tuilakna enkawl, tuaihnum leh vil zui zel kawngah a chhawrtu mipuite dah tel zel an nih thu a sawi a, tui pump chhuah mai bakah in tina tui connection pek vek tum a nih thu sawiin, Nizung chakna emaw, gravity leh ṭul dangte hmangin bial chhung khuate tui hnianghnar taka pêk kim vek tum a ni, a ti a, cheng vbc. 25 hmangin Khawhai Water Supply Scheme siam tum a nih thu leh, hemi kaltlang hian tuitlan mai bakah Khawhai khaw chung Dil leh a vel cheimawi hna thawh tum a nih thu a sawi a, khaw dangahte pawh tuilakna thawh mek niin, thawh lohna khuaah te pawh ruahmanna siama kutthlak thuai tum a ni, a ti bawk.

He tui lak hi mi pakhatin nikhatah tui litre 55 zel hmang anga chhutin mi 3,212 te kum 30 lo la awm leh tur thleng chawmzo tura duan a ni