School Education Minister Lalchhandama Ralte chuan kum 2 dawn khar tawh zirna in vawiin aṭanga hawn ṭan turah zirlai naupangte chu lehkha zirtir mai lova, lo titlangnel hmasaa hripui laka fimkhur dan turte pawh lo zirtir turin zirtirtute a chah a, zirna in hranga hranga inkhawmna hunah leh hun remchangah “Aw nang kan Lal kan Pathian” tih hlate chu sak tura ruahman a ni a ti bawk.
Nimina hmar tlangdunga sawrkar hmalak mekte a hmuna a enfiahnaah School Education Minister chuan zirtirtu indaihlohna hnawh-khah zel a ni a, kawng hrang hrangin hmasawnna hna thawh a ni, a ti a, sawrkar flagship programme SEDP pawh tihlawhtling turin sawrkarin hma a la mek a tih sawiin, a dawng thei thlangtu tur Village Level Committee pawh khaw tinah din thuai a ni dawn a ti bawk.
Minister chuan Mau-char leh Palsang khuaah Hmarlam tlangdung inkalpawhna kawngpui siam mekte leh feh kawng ṭhenkhat siam mekte a endik a, heng kawngpui hian heng lai hmunte chu Aizawl aṭanga tlawhpawh awlsam zawka a siam dawn bakah hmasawnna kawng tam takah a thlen dawn niin a sawi a, Kawngpui bakah Mauchar leh Palsang mamawh tui lak pawh chak takin thawh a ni tih sawiin, Solar Pumping Water Supply Scheme kalpui mek a ni a ti bawk.