Govt. Serchhip College-in NAAC Grade ‘A’ an nih lawmna hun Chief Minister-in a hmanpui

Grade A lawmpui nan Administrative Building sakna tur cheng nuai 612 pe dawn

Govt. Serchhip College chuan NAAC Grade ‘A’ Accredication pek an nih lawmna Ningani khan an college campus-ah an buatsaih a, khuallian nia he hun hmanpuitu Chief Minister Zoramthanga chuan Govt. Serchhip College-in an mamawh Administrative Building sakna tura cheng nuaih 612 an dil chu Grade A an hmuh lawmpui nan an pek dawn thu a sawi.

Chief Minister chuan Govt. Serchhip College-in Grade ṭha tak a hmu thei chu zirlaite leh zirtirtute hmalakna leh college administration ṭha taka kenkawh a ni tih a tihlang tiin, an college chuan a ṭul huna hmasawnna ruhrel din belh zel dawl tur hmunhma rem tak a nei chu vannei a tih thu sawiin, Grade A chung lama hlawhtlinna la awmte nei zel tura duhsakna hlanin zirtirtu te, thawktu dangte leh zirlai te an pawimawh em em a ni a ti a, Chief Minister chuan development kalpui dawn chuan thinlung leh ngaihtuahnate hi kawng chitin renga inbuatsaih a ngai a ni, a ti a, zirlaite chu a bik takin mahni inthunun a, tumruhna nen mahni hmazawn ṭheuhah theihtawp chhuah zel turin a chah a, harsatna hrang hrangte hi paltlang turin theihna kan nei tih hria a, min tichaktuah hman tum zawk turin a chah a ni. Govt. Serchhip College-in an mamawh em em Administrative Building sakna tura cheng nuai 612 an dil chu Grade A an hmuh lawmpui nan an pek dawn thu a sawi a, Coaching Centre kalpuina tura MYC-a ṭanpuina an dil pawh an hmuh theih nan a lo umzui dawn tih a sawi bawk.

Bialtu MLA Lalduhoma pawhin thu sawiin, Mizoram mai nilo India ram pumah pawh Govt. Serchhip College chu a chhuanawm tih a sawi a, hetiang dinhmun thleng turin Principal a pawimawh tih a sawi a, Faculty member-te leh staff-te chungah pawh lawmthu sawiin, zirlaite chungah pawh lawmthu a sawi a, Coaching Centre mumal taka kalpui chhunzawm zel a nih theih nan a MLA fund chu engtik lai pawn hman theih a ni dawn tih a sawi bawk.

He hunah hian Govt. Serchhip College-a lo zir tawh, Sports & Tourism Development Board Vice Chairman TC Pachhunga leh Serchhip DC Nazuk Kumar leh Higher & Technical Education Department Joint Director Dr. Lalthansangi Fanai-te pawhin an lawmpuina thu an sawi bawk.

Govt. Serchhip College Principal PC Lalremsiama chuan tun Assessment-ah hian CGPA 3.18 pek an nih avangin a thawhpuite chungah lawmthu a sawi a. Dr. C.Vanlalnghaka, IQAC Co-ordinator hnen aṭangin report tlangpui ngaihthlak a ni a, Sub-Hqrs. YMA leh Serchhip Teachers’ Association-ten Govt. Serchhip College lawmpuina thuziak an hlan bawk.

National Assessment and Accreditation Council (NAAC) hi UGC hnuaia autonomous body niin, ram puma zirna in sangah zirna quality ṭha a awm theih nana din a ni a, college leh university-te tehfung hrang hrang hmangin a endik ṭhin a ni.