Home » Chanchinthar » Inter-District Boxing Championship-ah Serchhip an champion

Inter-District Boxing Championship-ah Serchhip an champion

April ni 18 – 22, 2022 chhunga Aizawl Ramhlun Boxing Hall-a 18th Inter-District Boxing Championship 2022, neih zawh takah Serchhip District chuan Gold medal 11 leh Silver medal 11 la-in champion team an ni a, East Lungdar khua C.Zoremmawii chu Most Promising Boxer-a thlan a ni bawk.

He inelnaa tel tur hian Serchhip District aiawh turin Serchhip District Boxing Association chuan Boxer 37 a tir a, Boxer te hi Coach Freddy Lalchhanchhuaha leh Manager V.Zoramchhana-ten an hruai a, Aizawl District chu runner-up niin, Gold Medal 10 leh Silver Medal 9 an la ve thung a ni.

Serchhip bialtu MLA Lalduhoma chuan Boxing Final ni hian Serchhip District Boxer-te ṭawiawmin Championship Trophy a chawipui a ni.

Nikum March thlaa Aizawl Ramhlun Boxing Hall-a 17th Inter-District Boxing Championship khelhah khan Serchhip District hian Champion Trophy an hawn tawh a, nikum 2021-a Serchhip Boxing Hall a Mizoram State Boxing Championship neihah pawh khan an lo Champion tawh bawk a ni.

SEDBA chuan Inter-District Boxing Championship khel tura sum leh pai leh, an mamawh petute chungah lawmthu an sawi a ni.

Leave a Reply

This site uses Akismet to reduce spam. Learn how your comment data is processed.