Mizoram Lokayukta chuan a din tirh kum 2019 aṭanga kumin thlengin thubuai 44 a dawng tawh a, kumin chhunga thubuai an dawn 7 zinga 3 chu Lengpui airport cheiṭhat hnathawh kaihhnawih chungchang a ni.
Mizoram Lokayukta chhinchhiah danin, March 11, 2019-a chairman lâkluh a nih aṭanga April 16 thlenga a dawn tawh zinga 11 chu titawpin, regular investigation 7-ah neih mek a ni. Thubuai 39-ah preliminary enquiry (PE) neih tawh a ni a, PE report 24 dawng tawhin, PE la tihfel loh (pending) 15 a awm a, Case 3 chu PE neih hmaa chinfel a ni.
Lokayukta-in kumin 2022 chhunga thubuai 7 a dawn tawh zingah Lengpui airport cheiṭhat hnathawh mek kaihhnawih chung-chang chhui tura ngenna 3 a awm tawh a, chungte chu Mizoram Pradesh Youth Congress Committee, Zoram People Movement leh Mizoram First Movement te thubuai thehluh a ni.
Thubuai dangte chu NABARD loan hmanga school hrang hrang sak ṭhat chungchanga MPYCC thubuai thehluh te, PMGSY hnuaia Ngaizawl kawng siam chungchanga ZPM thubuai thehluh te, Ropeway leh Skywalk chung-chang a Tourism department thubuai thehluh bakah MZP Hqrs. Kolasib in DIET, Kolasib chungchang a thubuai an thehluh te a ni.
C. Lalsawta chuan tunhnai khan Mizoram Lokayukta dinhmun leh hmalakna tlangpui Mizoram Larsap hrilhin, hnathawktu tlemte chiah an la awm thu leh thawktu lak belh thuai mamawh a nih thute a sawi a ni.