Nimin khan State Bank of India chuan an Corporate Social Responsibility (CSR) atangin medical equipment cheng nuai 96.98 man hu a ṭul anga hman turin Chief Minister Zoramthanga hnenah an hlan a, heng bungruate hi Health & Family Welfare Department hnenah pek nghal a ni.
Bungraw inhlanna hun, CM office-a neihah hian Chief Minister chuan thu sawiin, mipui tana ṭangkai tur SBI in thilpek an hlan chu lawmthu sawiin, a hma pawha hetianga puihna ṭangkai tak tak an lo pe tawh ṭhin chu lawmawm a ti a. Thilpek hlantu Chief General Manager NE Circle, SBI RS Ramesh chuan CSR kaltlanga mipui hriselna enkawlna lam a theih ang anga khawtlang tana hmalak zel chu an ngaihpawimawh thu a sawi bawk.
Health &Family Welfare Department Principal Director F. Lallianhlira pawhin COVID-19 hrileng chu a la reh tak tak loh avangin test kit ṭhahnem tak dawn a ni chu lawmawm a tih thu a sawi bawk.