Vawk pùl hri, African Swine Fever (ASF) vangin kuminah khua leh veng hrang hrang 24-ah vawk 384 a thi tawh a, tun hnaiah vawk thi an pun belh leh zel avangin Inrinni khan Disaster Management Authority SEC Chairman leh Mizoram Chief Secretary Dr. Renu Sharma chuan state pawn leh ram dang aṭangin tiam chin awm lovin vawk lah luh a khap.
Chief Secretary chuan Mizoram pawn aṭangin vawk vulh tur leh talh tur lakluh a khap a, vawksa ei tura lakluh a khap bawk a, AH&Vety Department chu Mizoram chhunga vawk vulhna hrang hrang te fai taka enkawl a nih theihna turin uluk taka endik turin a ti a, Department chu ASF avanga vawk thi te sawngbawl kawnga felfai taka ruahmanna siam tuin a ti bawk.
Nikum March aṭanga Inrinni thlenga Mizorama ASF vanga vawk thi tawh zat chu 30,208 a ni a, March 2021 leh December 30, 2021 chhung khan Mizorama khua leh veng hrang hrang 272-ah ASF vangin vawk 29,824 a thi a, ni 35 chhung ASF vanga vawk thi a awm loh hnuah, February ni 4 khan ASF vanga vawk thi Champhaiah a awm leh ṭan a, Champhai Electric Vengah ASF vanga vawk thi nia rinhlelh awm chu zirchian a nih hnuah ASF vanga thi a ni tih finfiah a ni a, kumin February 4 aṭanga Inrinni thleng khan Champhai Electric Vengah ASF vangin vawk 64 a thi tawh a ni.
AH&Vety tarlan danin, kumin February 4 atanga Inrinni thleng khan Aizawl district-a khua leh veng hrang hrang 11- ah ASF vangin vawk 229 a thi tawh a, Lunglei district-a Chhumkhûm khuaah vawk pahnih, Champhai district-a khaw parukah vawk 109, Kolasib district-a khaw paliah vawk 39 leh Saitual district-a khaw pahnihah vawk 5 a thi tawh bawk.
ASF hri kumina a lên thar leh hnua ASF vanga vawk thi tamna ber, Aizawl district-a Sakawrdai khuaah chuan kumin February ni 23 khan vawk thi a awm ṭan a, March 7, 2022 khan ASF vanga thi a ni tih finfiah niin, Inrinni thleng khan vawk 134 a thi tawh a ni.