ZPM Vice President Lalthansanga (Chate-a), Ex-MLA chuan “ZPM pawh tum thuhmun neia mi vantlang kalkhawm kan nih avangin hei hi AAP Mizoram a ni mai,” a ti.
Nimina ZPM Chhung Inkhawmna hun an hmannaah Lalthansanga chuan Delhi hmasawn dan sawiin, “IRS Kejriwal chuan Delhi chawi-kangin Punjab-ah huhang na tak a nei a, IPS Duhoma hi Zoram Kejriwal a ni ngei dawn, chu chu kan tum a, kan thei ang tih a chiang a ni,” a ti a, “Therhlo leh pawisa nilovin hmathlir thui zawk nen Zoram kan kaihruai dawn a, Zoram hi kan dah hmasak phawt chuan Pathianin a hruai turin min dah em em ang,” a ti bawk.
“Party kan nih tawh rualin kan movement hi a la thi lo a, he movement-ah hian tu tan pawh hmun a awm a, party fir hlawm rilru put ringawt pawh a dik chuang lo. Party dangte min beihna leh kan hotute inkara hêmthlâk tumna hi keimahniah a awm reng reng lo, an party mite chelhbelh an tumna mai mai a ni. Thu an veivir thiam si a, tak tak emaw tih a awl khawp mai. Amaherawhchu, miten thu lawilo a ni tih an hriatin kan hnenah an lo kal zel. ZPM chuan nun kawng dikah mite kan kaihruai zel tur a ni,” a ti bawk.