Zothlifim Logo
Loading ...

India-in zalenna a hmuh kum 75-na lawmna kal zelah Tourism Department buatsaihin nimin khan Freedom Trek neih a ni a, Chief Secretary Dr.Renu Sharma-in Ailawng Khuangchera Hall kawt aṭangin Freedom Trek a telte hi a vailiam.

Dr Renu Sharma chuan Freedom Trek chu India ramin zalenna a hmuh theihna tura mahni inphat leh nunna chân huama pen chhuak pasalṭhate hriat-rengna leh chawimawina a nih bakah faina kawnga inzirtirna pawimawh tak a ni, a ti a. Mizorama Khualzinte hip kawnga ṭan lakna kawngah faina leh thianghlimna, sik leh sa ti chereu lo zawnga kal chu an tum a ngai a ni, a ti a. Faina beihpui thlak “Swachh Bharat Campaign – cum – Responsible Tourism” chu thupuia neih a ṭul a ni, a ti.

Freedom Trek-ah hian Aizawl khawpuia College leh Higher Secondary School zirlaite bakah ṭhalai rual 300 chuang an tel a, Trekking-a tel zinga upa ber hi Lalsanga, kum 92 mi, Bethlehem Veng, Aizawl a ni. Anni bakah hian Manipur aṭangin Tourism Department official an rawn tel bawk a, Sports & Youth Services Department aṭangin trekking expert ṭhahnem takin telpuiin, a ṭul angin an vil a, medical team-in trekking-a telte hi an vil bawk a ni.

Trekking hi Khuang-chera Hall, Ailawng aṭanga tan niin Reiek tlang chhip an chuan chhuah hnuah Reiek Tourist Resort an pan leh a, an kal thui zawng hi kilometre 5 leh a chanve a ni a, kawng lakah hian hahchawlhna hmun 5-ah siam a ni.

Faina kawnga inzirtirna atan trekking a tel zawng zawngte hnenah hian lehkha ip pek an ni a, trekking an neih pah hian kal kawnga bawlhhlawh an hmuhte an thianfai nghal a ni.

Azadi Ka Amrit Mahotsav pual hian Reiek Tourist resort-ah Adventure Festival neih a ni bawk a, he festival-ah hian adventure sports chi hrang hrang mipuite tan a thlawnin chhawpchhuah a ni.