Kumin March thla aṭanga vawk pul hri, African Swine Fever (ASF) leng nawn leh avanga Mizorama vawk thi zat chu 1,589 a tling ta.
Tun ṭuma vawk pul hri lêng nawn leh hi Champhai district aṭanga inṭanin Aizawl, Lunglei, Saitual, Khawzawl leh Mamit district-ahte a ṭai darh mek a, khaw mala vawk thih tamna ber chu vawk 319 thih tawhna, Aizawl districta Darlawn khua niin, vawk 295 thihna Sakawrdai leh vawk 140 thihna Champhai district-a Farkawn khuate hi a tuar nasa zual an ni.
Nimin bikah vawk thi 36 awmin, hri darh zel tur vênna atan vawk 385 suat a ni tawh bawk a, ASF vawk pulhri nia rinhlelh, la finfiah loh avanga thi zat hi 215 a awm tawh bawk.
ASF vawk pulhri hi nikum March ni 21 aṭang khan leng ṭanin vawk 33,000 chuangin a thih phah a, kumin January thla khan hrileng hi thunun tawh nia ngaiin, state pawn aṭanga vawk lâkluh khap chu hlih a ni a, March thla aṭangin hri hi a lêng ṭan leh ta a ni.