Home » Chanchinthar » Bawrhsap-hovin Serchhip bazarah plastic bag hman tlem dan tur sawiho

Bawrhsap-hovin Serchhip bazarah plastic bag hman tlem dan tur sawiho

Nimin khan Serchhip District Bawrhsap Nazuk Kumar, IAS hovin Serchhip Bazar building-ah Plastic bag, chawhmeh fûnna leh thil dang atana hman ṭhinte hman tlem dan tur sawihona hun hman a ni.

Serchhip Bazar Building-a sumdawngte nena plastic bag hman tlem dan tur sawihona hunah hian District Bawrhsap chuan, Mizoram sawrkarin polythene pan tak hman a khap tawh thu sawiin, ei tur, nepnawi leh bazar chawhmeh fûnna atana hman ṭhinte pawh khap tura tih a nih thu a sawi.

District Bawrhsap chuan Plastic aṭanga siam thilte chu ṭawih thei lo a nih avangin bawlhhlawh sawngbawlna hmunahte pawh a tam ber a ni zel a, buaipui a ngai tak zet tawh tih a sawi a, Polythene hmang tlêm tura hmalaknaah Bazara chawhmeh zuartute chu an pawimawh hle tih sawiin, a bul ṭantu leh mite zirtirtu an nih a ṭul thu a sawi a, a theih chin chinah a hman tlêm dan tura ngaihtuahna seng turin a sawm a, tun thla aṭang hian hman tlem dan tur zirin ṭan lak a ni ang a, thla thar aṭang chuan paper bag chauh hmang tura hmalak a ni tawh ang tiin, sawrkar hmachhawp a tarlang a, Dan hmanga khap beh ai chuan mitinin polythene hman tlem duhna thinlung nei vek zawk ila, kan ramin a hlawkpui hle dawn a, mipuite zirtirna pawh nasa taka kalpui an tum dawn tih a sawi bawk.

Hemi hnu hian Polythene hman tihtlêm a nih theih nana hmalak dan turte sawiho zui a ni a, Bazara sumdawngte hian tun hma pawhin polythene bag hmang tawh lo turin hma an lo la tawh ṭhin a, mahse a dawrtu mipui lam aṭanga harsatna an tawh ṭhin avanga an tih zui zel theih loh thute Bawrhsap hnenah hian an lo thlen a ni.

He hun hi Lalmuan-sanga Ralte, Addl. Deputy Commissioner-in a kaihruai a, Plastic aṭanga thil siam vawi khat hmana paih mai tur thil hi hman loh dan a awm em tih ngaihtuah a ṭul tak zet a, kan chhehvel thilte hi kan chenna hmun ang thoa kan enkawl a ngai a, kan tui tlan ber lui tuiahte kan plastic hman hnute a inzam nuaih zel mai a, hengte hi kan tihtawp a hun a ni, tiin plastic tihtlem a ṭulzia a tarlang bawk.

He hunah hian Lalzikpuii, SDO (Sadar), F.Lalnisai, SDC leh Lalthanghliri Pautu, DUDO Serchhip te an tel a ni.

Leave a Reply

This site uses Akismet to reduce spam. Learn how your comment data is processed.