Serchhip District Volleyball Championship 2022 chu nimin khan Bialtu MLA Lalduhoma’n New Serchhip Volleyball Court-ah a hawng.
Hawnna thu sawiin, Lalduhoma chuan District Volleyball Championship 2022 a hawng thei chu lawmawm a tih thu a sawi a, Covid-19 hri leng avanga hun rei tak Sports lamah activity neih mumal theih loh a nih hnuah, tun hnai aṭangin sports discipline hrang hrangin ṭan an han la leh a, hma an sawn zawt zawt mai a ni tiin, discipline tinah hmasawnna sang zawk nei zel turin duhsakna a hlan thu sawiin, “Beiseina sang tak in chungah ka nei a, kei pawhin ka theihna chinah theihtawp ka chhuahpui zel dawn che u a ni,” a ti.
Lalduhoma chuan Serchhip District-a Volleyball hmasawnna hrang hrang a tarlang a, Youth Recreation Centre, Darnam tlanga sak mek Top Floor chu Volleyball Court tura ruahman a nih thu te, VC-te hmalakna zarah Chanmari leh New Serchhipah Volleyball Court thar ṭha tak neih a nih thu te, National Junior Championship 2021 ah Serchhip District-in aiawh pakhat a thawh ve thute leh National Referee tling thar mi 2 an awm thute a sawilang a, heng bakah hian District-a sport discipline hrang hrang hmasawnna hmuh tur a awm zel chu lawm-awm a tih thu a sawi bawk.
Serchhip District Volleyball Championship 2022 hawnna hi VL Hruai-tluanga, Sr. Vice President, SDVA-in a kaihruai a, Laldinpuia, Match Commissioner hnen aṭangin report ngaihthlak niin, he Championship khel tur hian khawchhung mai bakah khaw ṭhenawm aṭangin mipaah team 11 telin, group 4-ah ṭhen an ni a, Group tin aṭanga a tiṭha pahnih zel quarter final khel turin an tling dawn a ni. Hmeichhe lamah team 5 telin, an inkhel kual ang a, point hmusang pahnihin Final an khel ang.
Nimin khan Miipa lamah Thenzawl VC-in 25-22, 25-21-in Vengchung VC (Green) an hneh a, Vengchung VC (Blue)-in 22-25, 25-23, 19-17-in Hriangtlang VC an hneh thung a, Highland Brothers-in 25-19, 25-20-in Chhim Veng VC an hneh a, Keiṭum Kawn Veng VC-in 25-21, 25-16-in New Serchhip VC an hneh bawk.
Hmeichhe lamah Dinthar VC-in 25-13, 25-15-in Chanmari VC an hneh a, Bungtlang VC-in 25-21, 22-25, 15-8-in Vengchung VC an hneh a, vawiin chaw-hma dar 9:30 aṭangin khelh chhunzawm leh a ni ang.