Zothlifim Logo
Loading ...

UK sawrkar chuan LA Dodgers co-owner Todd Boehly consortium-in £4.25 billion-a an leina chu a pawmpui ta.

Chelsea hi a neitu Roman Abramovich chu Russian president Vladirmir Putin nen inṭhian hnaivai tak an nih avangin March ni 10 khan a hrem a, hemi hma March ni 2 khan Abramovic hian Chelsea chu hralh tura ruahmanna a awm thu a lo sawi tawh a ni.

Hemi hnu hian Chelsea lei tum hi hian dawrtu an awm nual a, Boehly-led consortium hian May ni 7 khan £4.25bn-a lei hi an remti a, mahse hemi hnu hian Abramovich hian a sawi anga hlawkna a tel lo vek dawn lo nia a lan avangin indawrna hi a tlawlh leh ṭep a, mahse Ambramovich chuan club hralh a nih huna Chelsea-a loan a puktir £1.5bn rûl leh tura a hrilh nia sawi awm chu a dik lo tih a sawi a, sawrkarin a chhui zui a, Abramovic hian hlawkna a tel dawn lo tih an chian hnuah a pawmpui ta a, Thawhlehi khan Premier League pawhin consortium hian owner leh director test an paltlang thu a sawi a ni.

UK sawrkar chuan Chelsea hralhnaa hlawkna hi Abramovic-a’n a dawng tur a ni lo a ti a, tuna an hralhna pawh hi Abramovic-a’n a sawi angin, sawrkar frozen bank account-ah a lut ang a, charity atan sem chhuah a ni dawn a ni.

Abramovich hian kum 2003 June thla khan Chelsea hi Ken Bates hnen aṭangin a lei a, kum 19 hnuah Roman Abramovich era chu tihtawp a ni ta a, tunah chuan neitu thar hnuaia Thomas Tuchel pawhin transfer bazar-ah eng angin nge a chet dawn tih a thlir leh theih tawh dawn a, heti hian Premier League club zingah, Chelsea, Liverpool, Arsenal leh Manchester United-te chu a neitute chu US lam mi vek an ni ta a ni.

Abramovich hnuaiah Chelsea hi khawvela football club lian ber zinga mi an ni chho a, trophy 21 lai chawiin, an champion theihna zawng zawngah an champion kim hman vek a, trophy an chawite hi – Premier League title 5 leh UEFA Champions League title 2 bakah FA Cup 5, League Cup 3, Europa League 2, Super Cup 2 leh Club World Cup pakhat an chawi hman a ni.


Warning: Undefined variable $post in /home/lahj9ae7in9c/public_html/wp-content/themes/newsup/inc/ansar/hooks/hook-index-main.php on line 117