Zothlifim Logo
Loading ...

Mizoram Pradesh Youth Congress Committee (MPYCC) chuan Mizoram mipui tam takin harsatna nasa tak an tawh mekna, damlote pawisa hmuh let tur Medical Reimbursement (MR) bill pek theih loh chungchangah nimin khan Mizoram Health Care Society Office an tlawh.

Congress Thalai President Dr. Lalmalsawma Nghaka leh a thawhpuite chuan MHCS-a hnathawktute hi Health Care Bill-a cheng vaibelchhe 71 chuang tang mek avanga mipuiin harsatna an tawh nasatzia te an sawipui a, sawrkarin damlote pawisa bill a bat zat hi Lalhruaitluanga Bawitlung, MPCC Secretary-in RTI aṭanga a zawhna chhânna atanga a lan danin April ni 30, 2022 thlengin ₹71,21,84,104 a ni.

Congress Ṭhalai chuan nimina thuchhuah an siamah Health Care lama thawktute chuan theihtawpin Health Care-a bill tang mekte chu ûmzuiin, Finance leh Planning-ahte an nawr ve reng a, mahse sum harsat avangin hmasawnna erawh a awm hlei thei lo, an ti niin an tarlang a, Dr. Lalmalsawma chuan Mizoram Budget a pung chho tual tual a, chhiah hrang hrang aṭanga sawrkara sum lût pawh namen lova nasain a pung mek a ni, a ti a. Chutihlai erawh chuan mipuiin an ‘Safety Net’ ve atan Health Care-a an in-register thlap hnu leh, a Premium-te pe a, anmahni lama an tih tur tifel vek chunga hun rei tak an bill a tang chu vanduai thlak an tih thu leh harsatna nasa tak an tawh phah chu pawi an ti hle tih a sawi a ni.

“Planning lam leh Finance Dept. lam pawh an mangang tih kan hria a, Non-Plan Expenditure a sang lutuk vang tih a chiang hle. Kan Finance Minister, Chief Minister ni bawk hian Mizoram mipui min hlawhchham pui hneh hle tih a chiang a, Speaker lar takin a sawi ‘Titi-a Distinction’ ringawt ni lo, hna thawk thei tak tak tur CM Mizoramin kan mamawh zia a tichiang leh zual a ni,” Congress Ṭhalai President chuan a ti bawk.