Home » Chanchinthar » CYMA-in Bamboo Industry Kudam-a Burma Kuhva rah ro dahkhawmna hmun tlawh

CYMA-in Bamboo Industry Kudam-a Burma Kuhva rah ro dahkhawmna hmun tlawh

Central YMA hruaitute chuan an President R.Lalngheta hovin Inrinni khan Bairabi-a Zampuimanga Group YMA-in an man Burma Kuhva rah ro, dân lova tawlhrûk dahkhawmna hmun Kuhva Kudam an tlawh.

Central YMA hruaitute leh Zampui-manga group YMA hruaitute hi Bairabi South Branch YMA office-ah inkawm khawmin, he hunah hian Central YMA Pre-sident R.Lalngheta chuan, “Zampuimanga Group YMA-in dan lova Kuhva rah ro tawlh ruk dahkhawm ṭhahnem tak in lo man hi Central YMA thuchhuak bawhzuina a ni a, lawmawm kan ti hle a ni. Burma aṭanga dan lova lo kal Kuhva rah ro tawlh luh leh Mizorama awmsa lakchhuah chungchang-ah Central YMA chu a dinna ngai ah a la ding reng a, Central YMA-in a tih dan tur a relfel hma chu Burma Kuhva rah ro hi tuman a rukin emaw kan thiam dan anga lo tawlh lo turin kan inngen nawn leh a ni. Burma aṭanga Kuhva rah ro tawlh chungchang hi Central YMA chuan a zirchiang tu tur study team a siam tawh a, Central YMA study team-te hian Mizoram hmun hrang hranga kuhva rah ro dahkhawmna kudam an tlawhkual tawh a, mi chi hrang hrang an kawm tawh bawk a ni,” tiin, Central Executive Committee (CEC) meeting thu-tlukna angin kalpui a ni dawn tih a sawi bawk.

Zampuimanga Group YMA chuan ni 23.2.2022 khan Bairabi North-a Bamboo Industry Kudam-ah Burma Kuhva rah ro dahkhawm ṭhahnem tak a awm thu an dawng a, police-te nen enfiah nghal niin, kuhva rah ro hi ṭhahnem tak a lo awm a, a enkawltute chuan document hrang hrang, permit an neihte pe turin an ngen ang an pek theih loh avangin ni 13.4.2022 khan Zampuimanga group YMA hruaitute chuan Bairabi SDC-ah First Information Report (FIR) an thehlut ta a ni.

Bairabi South Branch YMA office-a inkawmkhawmna neih zawh hian Bairabi North-a Bamboo Industry Kudam-a Burma Kuhva rah ro dahkhawmna hmun chu Central YMA hruaitute leh Zampuimanga group YMA hruaitute chuan an enho a ni.

Leave a Reply

This site uses Akismet to reduce spam. Learn how your comment data is processed.