Skip to content
Home » Chanchinthar » Khanpui leh Lailak VC-ten NGT thupek dodal an tum

Khanpui leh Lailak VC-ten NGT thupek dodal an tum

Khanpui leh Lailak VC leh NGO ṭangrualte chuan National Green Tribunal-in Chalfilh tlanga Tourist Lodge ṭhiat tura thupek a chhuah chu a tawp thlenga dodal an tum.

Khanpui YMA President Lalrinmawia chuan, “Kan ram a nih angin Chalfilh tlanga Tourist Lodge tihchhiat tumna hi kan do tlat a, hemi chungchangah hian high court-ah pawh PIL kan thehlut tawh a ni,” a ti a, Chalfilh chu Forest Department ram a ni lo nia sawiin, “Forest ram ni tur chuan notification-te chhuah a, hearing-te neih a ṭul a. Mahse, heng zawng zawng hi tih a ni lo vek a ni,” a ti a, “Tuna Lodge hi ṭhiat mah se a sawngsaw-hlawtna tur a awm lo a, keini chuan tun aia chang-tlung zawkin cheibawl se, an sak zawh lohte hi sak zawh nise kan duh zawk a ni,” a ti.

Khanpui leh Lailak All NGO Coordination Committee chuan forest department-in an ram chhhung anga an lo cheibawl ṭhin, Chalfilh Tourist Lodge chu, Lailak leh Khanpui ram chhung a nih angin engti kawng maha ṭhiah an remtih ngai loh thu an sawi a Mizoram sawrkarin July 13, 1976-a Chalfilh State Reserved Forest Area atana notification a lo chhuah chu a ram neitu, Lailak leh Khanpui khuaten an hriatpui lo mai ni lovin a huam chhung khuaahte public hearing neih a ni lo niin an sawi.

Centre for Environment Protection chuan August 25, 2017 khan NGT-ah Chalfilh tlanga Tourist Lodge chu ṭhiat turin an ngen a, November 17, 2021 khan thla khat chhunga ṭhiata thianfai vek tur leh January 7, 2022-ah hmalak dan a thlalak nen NGT-a thehlut turin Mizoram sawrkar a hriattir a, Mizoram sawrkar chuan December 16, 2021 khan ṭhiat lo tura ngenna hi NGT ah a thlen ve leh a, Tourism dept.-in Chalfilh tlanga Tourist Resort a siam chu May 17, 2022 hmaa ṭhiat turin Jan. 19, 2022 khan NGT chuan Mizoram sawrkar a hriattir nawn leh a, ṭhiah a la ni lo nia thudawn a ni.

-Zalen

Leave a Reply

This site uses Akismet to reduce spam. Learn how your comment data is processed.