Naktuk, Ningani aṭanga Pathianni thlenga Kristian Ṭhalai Pawl (KṬP) General Conference vawi 59-na neihna tura buatsaihnate chu peihfel a ni tawh a, nizan khan KṬP Generel Conference neihna tur, Kolasib Diakkawn Field-a Pandal sak chu Pathian hnena hlanna inkhawm neih a ni.
Pandal chhungah hian mihring 11200 len theihna tur ṭhutphah siam a ni a, Conference senso atan hian ₹72,87,400/- ruahman a ni a, Central KṬP aṭang te, Kolasib khawchhunga Pastor bial 5 aṭangte leh mi ṭhahnemngaite aṭangin sum thawhkhawm a ni a, Pandal bik atan hian cheng nuai 18 ruahman niin, Pandal hi Kolasib khawchhunga Pastor bial 5 aṭangin KṬP leh kohhran mipuite a inchhawka hnatlang tha hmanga sak a ni.
Kumina KṬP Gen Conference ah hian thupui atan ‘Tunlai thil awmzia’ (Rom 13:11) thlan ani a, Speaker turin Revd.Chuauṭhuama hman a ni ang.
KṬP General Conference Organising Committee hruaituten an dil angin Kolasib DCSO chuan buhfai Quintal 204 hralh phalna a pe a, buhfai hi Supply Kudam aṭangin Kolasib khawchhunga KṬP Branch 14-a hruaitute hnenah a tahtawlin pek chhuah mek a ni a, Veng hrang hranga KṬP Branch hruaitute chuan an veng chhung ṭheuha mikhual thleng turte hnenah Ration buhfai hralhna ratein an hralh leh a ni.