KTP kumpuan thupui atan ‘Tawngtai tam’ tih thlang

Kristian Ṭhalai Pawl (KṬP) General Conference vawi 59-na, Diakkawn Field, Kolasib-a nghah chu nizan khan a ṭiak a, kumin conference-ah hian kum-puan thupuiah Kawlkulh Bial rawtna, ‘Ṭawngṭai tam’ tih chu pawm a ni.

Conference vawi 59-na thupuiah ‘Tunlai thil awmzia’ (Rom 13:11) tih hman a ni a, Speaker atan Revd Chuauṭhuama, Ramhlun Vengchhak hman niin, Inrinni zan, Pathianni chawhma leh chawhnuahte thu a sawi a ni.

Inrinni zingah kum 2022–2024 chhunga Central KṬP hruaitu thar thlan a ni a, mi 25 thlan chhuah an ni a, Synod-in Leader atan Rev.Dr F Pachhunga leh General Secretary atan Upa Rochungnunga te a ruat sa a, hei bak office bearer dang chu thlan chhuah aṭang hian ruat an ni a, Assist. Leader-ah LV Lalthantluanga, Chanmari Bial, Asst. Secretary-ah Upa Johny Lalawmpuia, Armed Veng Bial, Treasurer-ah T.Upa Vanlalnunmawia, Venghnuai Bial leh Fin. Secretary-ah Upa H.Zoherliana, Luangmual Bialte ruat an ni.

Inrinnia CKṬP Leader Rev. Vanlalmuanpuia Khiangte kaihhruaia rorel inkhawm neihah General Agenda 10 chhawpchhuah niin, Koh-hran Humhalh Chungchang inzirtirna neihte relin, kum 2026 Khawmpui thlengtu turin Saitual thlan a ni a, kum 2022-2023 Budget atan cheng nuai 66.1 an pawm bawk.

Inrinni khan Multiples Programme hman a ni a, Kolasib khaw chhunga biak in pathumah thupui hran hran hmangin thuchah ngaihthlak a ni a, nizan inkhawmah Synod Moderator Rev. Dr. Vanlalnghaka Ralte-in CKṬP hruaitu thar hlanna hun a hmang a, CKṬP Leader kal chhuak Rev. Vanlalmuanpuia Khiangte-in Pathian thuchah a sawi bawk a ni.