Deprecated: Function is_staging_site is deprecated since version 3.3.0! Use in_safe_mode instead. in /home/lahj9ae7in9c/public_html/wp-includes/functions.php on line 6078
Kum 16 tling tawhte an pawi khawih a zirin puitling hremna ang tho an hmachhawn thei – Zothlifim
Deprecated: Function is_staging_site is deprecated since version 3.3.0! Use in_safe_mode instead. in /home/lahj9ae7in9c/public_html/wp-includes/functions.php on line 6078
Zothlifim Logo
Loading ...

Kolasib District Child Protection Officer Dr David Zaitinvawra chuan naupang kum tling lo dan bawhchhia zingah kum 16 tling tawhte chu an pawi khawih a zirin puitling hremna ang tho an hmachhawn theih thu a sawi a, naupang pawikhawih an awm chuan khawtlangin hma la tho mahse a theih chen chenah Juvenile Justice Board-ah thlen zel a ṭhat thu a sawi.

DCPO hian nimin khan ama officeah Kolasib district MJA te chu lengah sawmin naupang dikna chanvo humhalh kawnga an hmalakna a sawipui a, dan bawhchhia naupangte chu special homeah emaw, remand home-ah emaw dah an nih ṭhin thu a sawi. “Pawikhawih zingah pawh kum 16 tling tawh chinte chu an thiltih a zirin, puitlingte hremna ang tho pek a, jail-ah khung theih an ni,” a ti a, “Naupang ṭhenkhat chu counselling pek ngai te an awm ṭhin a, dan hmangin a ṭul anga enkawlna pek leh kaihhruai an ni ṭhin,” a ti. Hei bakah naupang pawikhawih an awmin anmahni ngaihventu tur bik police-te an awm thu leh chutiang mite lo chuan man theih an ni lo tih a sawi bawk.

Fa lak chungchangah dan anga thil kalpui theihna chu JJ Act ah chiang taka tarlan niin DCPO chuan a sawi a, “Kolasib district-ah hian dan anga fa lak theihna, naupang awmna home kan nei lo,” tiin hetiang buaipuitu tur ‘Specialised Adoption Agency’ te chu district dangah a awm thu a sawi. Dan ang lova fa inpek chu hrem theih a nih laiin, dan zawm chu a him thu leh naupang leh fa latu te tan pawh a ṭha zawk tih a sawi bawk.

Home-a naupang dah chungchangah Child Welfare Committee ten a awm thei turte uluk takin an ngaihtuah ṭhin tih pawh a sawi a, “Tunhma deuh, dan kan neih hma khan home-te hi an awm ve tawp a, tunah chuan dan hnuaiah felfai taka awm a ni. CWC te hian home-a naupang dahluh leh lakchhuah chungchang hi uluk takin an vil reng a, awm tlaka a ngaihte chauh home-ah dahluh ṭhin an ni. An chhuah dawn pawhin CWC bawkin order a siam a ngai,” tiin home te chu JJ ACT hnuaiah in register vek a ngai tih a sawi a ni.

DCPU Office chuan naupang harsa bikte chhawmdawlna sponsorship scheme kaltlangin Kolasib district-ah kum tin naupang 40, sum leh paiin an chawm ṭhin tih a sawi bawk a, he programme chhunga lut thei te uluk takin, guideline in a sawi angte an ni em tih an dinhmun zirchian hmasak ṭhin an nih thu a sawi. Hetih lai hian nikum khan sponsorship atana sum hmuh tur ang hi hmuh kim a ni lova, kumin sorkar kumthar aṭanga sponsorship dawng thei tur pawh thlanchhuah an la ni lo tih a sawi bawk.

Kolasib MJA president Andrew VL Auva pawhin naupang venhimna kawnga office hnathawh chu fakawm a tihthu a sawi a, MJA te chu an hnathawha ṭawiawm turin an inpeih reng thu leh a ṭul anga puanzar ngai a awm a nih pawhin in hrilh hreh lo turin a chah a ni.