Zothlifim Logo
Loading ...

State sawrkarin Lawngtlai District Hospital-a Doctor pali a sawnchhuahna Order sût tur leh Doctor dang dah belh tura an ngenna tihhlawhtlin a nih theih nana sawrkar an nawrna kal zelah, Central Young Lai Association chuan vawiin hian Lawngtlai leh Bungtlang South-ah sawrkar Office, zirna in leh Bank-a kal turte an dang dawn a, hemi chhung hian sawrkar hnuaia hmasawnna hna thawh mekte pawh châwl turin an ngên.

Central YLA hruaitute hian nimin khan Lawngtlai Press Club-ah Thuthar thehdarhtute kawmin, Central YLA President HC Vanlalruatpuia chuan, Lawngtlai District Hospital-ah Doctor indaih lohna a nasat avangin Chief Minister hnenah ziak leh ṭawngkaa Doctor 4 – Gynecologist, Paediatrician, General Surgeon leh Eye Specialist-te dah belh tura an lo ngen tawh thu sawiin, dah belh lova, a awmsa pali sawn chhuak a, midang pathum dah luh an ni chu hriatthiam theih a nilo a ti a, nunphung pangngaiah pawh District hnufual, mipui tamna, Doctor indaih lohna a nasat tawh laiin, Myanmar ram buai vanga raltlan mi singkhat vel Lawngtlai District-in a kawl lai, Doctor mamawhna a san zual laia Doctor pali sawn chhuah an ni leh midang pathum dahluh an ni chu, District mipuite zah lohnaah Central YLA chuan a ngai tih a sawi.

Central YLA thuneitu sâng Central Executive Committee chuan hemi chungchanga a hmalakna kal zelah, vawiin hian sawrkar Office, Bank leh Zirna Ina kal turte dan nise an ti a, hmalaknain awmzia a nei lo a nih chuan nasa zawkin hmalak chhun-zawm an tum tih Chanchinbumite an kawmna hian Central YLA hruaitute chuan an sawi.

Mizoram sawrkar chuan tun thla ni 20 khan LawngtlaiDistrict Hospital Doctor pahnih sawnchhuahna Order a tichhuak a, hemi hnu ni 23 khan he Hospital-a thawklai Doctor pahnih dang sawnna Order tichhuak leh in, midang pathum District Hospital, Lawngtlai a dahna order a tichhuak a ni.