Lunglei District Congress Committee chuan nimin khan Lunglei Bhawan-ah “Municipality Zirhona” hun an hmang a, Resource Persons atan Pu Rosiamngheta AMC Councillor leh Dr. Lallianchhunga MPCC Spokesperson te hman an ni.
He huna thusawitu LDCC President Pu C Lalhmingliana chuan, “Kan hma lawka LMC inthlan kan hmachhawn turah LMC Sub-Committee, kan hotute’n miṭha tak tak ding tur an dap a, chung mite chu an ding vek thei a nih chuan LMC inthlan kan hmachhawn turah hian Congress Party chuan hnehna kan chang ngei dawn niin a lang” a ti a. Municipal hi hmasawnna leh thil ṭha tak a nih rualin, mipui nawlpui, mirethei tan erawh NREGS a awm tawh lo tur erawh mi harsa zawkte tan a uiawm dawn hle niin a lang a, heng mi harsa zawkte hmakhua hi engtin nge ni ang tih hi ngaihtuah zui ngai tak a ni a ti bawk.
Resource Person Dr. Lallianchhunga chuan Paper present in Municipality nihphung, Mizorama kan kalpui chhoh dan leh Aizawla hman mek a nih dan te chipchiar takin kalkhawmte hnenah zirtirna an pe a. Resource Person dang AMC din a nih aṭanga a dinna Ward a vawiin thleng la tling char char, Councillor Pu Rosiamngheta pawhin AMC a taka kalpui a nih dante a sawifiah bawk.
Tunah hian Lunglei Municipal Council din tura inthlanna buatsaih turin sawrkar a inpuahchah mek a ni.