Mara Autonomous District Council (MADC) inthlannaah sawrkarna siam thei khawpa chak an awm lova, nimin thleng khan sawrkar siam thei tura thawhhona siam puitling an la awm rih lo bawk.
MNF Party aiawhin nimin khan Minister Dr. K. Beichhua-a’n Siahaah thuthar thehdarhtute a kawm a, tun thlenga sawrkarna siam thei han sawi mai tur an awm loh avanga, Mara mipui chiai taka an dah chu MNF party chuan pawi an ti hle tih a sawi a, sawrkarna siam tura an hmalak mekna a hlawhtling lo palh a nih pawhin opposition ni ngam turin lungrual takin an inpeih thlap sawiin, sawrkarna siam tura hmalakna chu an la khar lo va, sawrkarna siampui thei tan chuan inbiakremna nen kawng zau tak an hawng reng tih a sawi a ni.
Hetihlai hian nimin zing khan BJP hruaitute chuan MDCC President S.Hiato hmu lehin, a ṭum thumna atan Congress chu sawrkar siampui turin an sawm leh a, thuthlukna felfai erawh an la siam lo nia hriat a ni.
MADC sorkar thar dinna turah hian boruak a tang hle a, BJP in seat 12 lain seat khat chauh an mamawh tawh a, MNF hian seat 9 lain sawrkarna siam turin seat 4 an mamawh thung a, INC hian seat 4 an chang a ni.
MADC-a CCB rules ah Anti defection law awm mahse hman theih a nih tawh loh avangin mimal anga khawrh chhuah theih a ni thung tih thulakna chuan a sawi a, hei vang hian Congress MDC tlingte leh MPCC, MDCC hruaitute hi BJP leh MNF hruaitute pawhin an lenchilh mek a, thutlukna mumal erawh a la awm lo a ni.
Hetihlai hian sawrkarna siam tura BJP leh MNF-ten an rim mek, Mizoram Pradesh Congress Committee PAC chuan BJP leh MNF thawhpui loh an relthu tih Congress MLA Zodintluanga leh MDCC President S.Hiato-ten Siahaah thuthar thehdarhtute an hrilh tawh a, Zodintluanga chuan MPCC PAC thuchhuak puangin tuna MADC sawrkar thar dinna turah Congress party chuan central leh state-a an khingpui ber BJP leh MNF-te chu thawhpui loh nise, tiin a rel a ti a ni.