Skip to content
Home » Chanchinthar » MADC-ah sawrkarna siam tur la chiang thei lo

MADC-ah sawrkarna siam tur la chiang thei lo

Mara Autonomous District Council (MADC) inthlan vote tlate chhiarfel a nih hnuah sawrkarna siam tur an la chiang thei lo.

Mizoram Pradesh Ccongress Committee PAC chuan BJP leh MNF thawhpui loh an rel a, he thu hi nimin khan Congress MLA Zodintluanga leh Mara District Congress Committee President S.Hiato-ten Siahaah thuthar thehdarhtute an hrilh a, Zodintluanga chuan MPCC PAC thuchhuak puangin, tuna MADC sawrkar thar dinna turah Congress party chuan central leh state-a an khingpui ber BJP leh MNF-te chu thawhpui loh nise, tiin a rel a ti a ni.

MADC sawrkar thar dinna turah hian boruak a ṭang hle a, BJP-in seat 12 lain seat khat chauh an mamawh tawh a, MNF hian seat 9 lain sawrkarna siam turin seat 4 an mamawh thung a, INC hian seat 4 changin an kalna lam apiang sawrkar tur a ni.

Hetihlai hian MADC-a CCB rules-ah Anti defection law awm mahse hman theih a nih tawh loh avangin mimal anga khawrh chhuah theih a ni thung niin, hei vang hian Congress MDC tlingte leh MPCC, MDCC hruaitute hi BJP leh MNF hruaitute pawhin an lenchilh mek a, thutlukna mumal erawh a la awm lo a ni.

Hetihlai hian thulakna pakhat chuan seat khat chauh mamawh BJP-in thawhhona sawrkar/sawrkar inṭawm din ai chuan Congress aṭangin emaw MNF aṭangin tu emaw ber CEM atan sawm luh a, MADC-a BJP kaihhruai sawrkar din chu BJP thil tum ber nia a lan thu a sawi a, hetihlai hian BJP aṭanga MDC thlan thar zingah pawh CEM inchuhna a nasa tho nia hriat a nih thu te, hemi vang hian an vaia an pawm theih tur party dang a mi CEM tur sawm luh mai chu BJP lam tan pawh damtlanna ber ni dawn a hriatna te pawh a awm niin a sawi a, BJP-in CEM atana an sawm luh tur hi MNF atang pawhin a ni thei a, INC aṭang pawhin a ni thei, tuna thlantlinte mimal dinhmun en chuan INC aṭanga tling zingah CEM han ni thei tur an awm lutuk lo zawk niin a sawi bawk.

MADC sawrkar thar hi May 13, 2022 hmaa siam turin State Election Commission (SEC) chuan thupek a chhuah tawh a, an in-form fel thei lo a nih chuan Governor rules-ah an awm ang a, inthlan ṭhat huaihawt leh thlengin hmalakna kalpui tur a ni dawn a ni.

Leave a Reply

This site uses Akismet to reduce spam. Learn how your comment data is processed.