Naktuka Mara Autonomous District Council (MADC) inthlan vote thlakna tur atana campaign theih hun chu nimin tlai dar 5 khan a tawp a, inthlan campaign pawhin a vawrtawp a thleng ta bawk a, nimin khan party tinten an theihtawp chhuahin mipui vote an zawng a, nimin ruahsur leh khaw nuamlo karah pawh campaign hi ngawrh takin an bei chhunzawm a ni.
MADC inthlanah hian BJP leh MNF chu inbei ber niin, a mala sawrkarna siam tumin ṭan an la nasa a, party pahnih campaigner-te pawh an hraw hle a, BJP hi Union Minister leh MP-te bakah National level party hruaitu lawk tak takte bakah State level hruaituten an campaign-pui a, state-a rorel lai MNF party pawh Minister leh MLA bakah party hruaitu campaign beihpui thlaktu an tamin, nimin thleng khan mi ṭhahnem takin an la chamchilh a ni.
MADC sawrkarnaa tel ngei tum bial 23 chuhtu INC pawhin bial ṭhenkhat lak ngeia awmze neia sawrkarna siam tumin beihpui an thlak reng bawk a, party hruaitu lawk tak tak senior leader an nei nual a, anni bakah State MPCC hruaitute an MLA rualten theihtawp an chhuah bawk a, inthlanna tingaihnawmtu an ni mek bawk
Tunhnaia bu khuar thar ZPM, he inthlana bial 8 chuhtu pawh an president hovin nimin tlai thleng khan an la campaign zui a a, bul ṭan ṭhat hle an tum a, chi ṭha tak tuh an tum tih sawiin, campaign hi an beingawrh hle a ni.
Inthlan inbuatsaihnaah hian harsatna lian tham engmah a thleng lo a ni.
Naktuka MADC inthlan vote thlak huna Official Duty turte chu Siaha Deputy Commissioner, Returning Officer Lalsang-liana’n nimin khan a vailiam a, Strong room-a uluk taka venhimna hnuaia dah ṭhat EVM-te chu All Political Party aiawhte leh Media hmaa hawn a ni a, duty tura ruat Presiding Officer leh Polling officer -te hnenah EVM leh thil pawimawhte pek an ni.
Polling official duty tura vailiam te hi khaw-thlang lam Palak Assembly bial lama duty tur an ni a, vawiin hian Siaha khaw chhung leh a hnaivai zawka duty turte an kal chhuak ve leh ang.