Tunlai hian Mamit khawpui chhungah Vawk hri lengin New Mamit VC area chhungah vawk 35 vel a thih tawh bakah tun hnaiah Lengte leh W Phaileng khua a vawk thi te African Swine Fever ani tih finfiah anih avangin nimin khan Mamit District Magistrate Lalnunhlua chuan Mamit district chhung a ranvulh te alo him zawk theih nan District dang leh State pawn atang te a Vawk emaw Vawksa atanga thil siam reng reng lak luh phal lohna thupek a ti chhuak.
New Mamit VC chhinchhiah danin vawk 35, – vawk lian talh rual 13, a laihawl 3 leh a note 19 a ni a, nimin lamah vawk 3 thiin vawiin ah 2 an thi leh bawk a ni. Heng Vawk thi te hi ASF vanga thi an nih leh nih loh hriat ala ni lova, ASF natna lan chhuah dan ang erawh hmuh tur a awm a, Vawk thi thenkhat te chu ASF sample lak nimahse result hriat ala nilo a ni.
New Mamit khawthlang hruaitu VC te chuan an veng chhung a vawk thi te hi an buaipui vek a, Vawk thi tam zawk te hi chu vawk neitute huanah khawthlang hruaitute hriatpuina in sorkar in ASF vawk thi te phun dan tur a tih ang thlap a phun an ni a, vawk phumna neilo te chu khawthlang hruaitute leh Forest department te ruahman angin mihring chenna atanga hla tak, Forest reserve ngaw chhungah sorkar in ASF vawk phum dan tur a tih angin chinai thi tam tawk nen a phum an ni bawk.
ASF vawk pulhri hi nikum March ni 21 atang khan leng tanin vawk 33,000 chuangin a thih phah a. Kumin January thla khan hrileng hi thunun tawh ni a ngaiin state pawn atanga vawk lakluh khap chu hlih a ni a. March thla atangin hri hi a leng tan leh ta a ni.