Home » Chanchinthar » Mau chungchang sawihona ‘Round Table Conference’ Aizawlah neih a ni

Mau chungchang sawihona ‘Round Table Conference’ Aizawlah neih a ni

India zalenna kum 75-na lawmna kal zel, Azadi Ka Amrit Mahotsav “North East Fest” pualin Mau chungchang sawihona, Round table discussion chu Aijal Club-ah neih a ni a,, Horticulture Development Board Vice Chairman Prof. F.Lalnunmawia’n a hmanpui.

Khuallian Prof. F.Lal-nunmawia chuan thu sawiin, Azadi Ka Amrit Mahotsav “North East Festival” denchhena Horticulture Department-in Bamboo Roundtable Discussion a buatsaih chu lawmawm a ti a, kum hnih kalta chhungin Horticulture Department chuan pilot project atan Dendrobium brandisii leh D. sikkimensis plantation-ahte nasa takin ṭan a la a, heng bakah hian Bamboo Link Road project pawh sawrkar laipui chuan a pawmpui tawh a ni a ti a. India rama bamboo resources 28% hi North East India-ah awmin, bamboo forest hian total forest area aṭanga chhûtin 12.8% a zau a awh a, North East state zingah Mizoram chu bamboo diversity nei sang berin, chi 30 lai kan ramah a awm a ni a ti a, Khuallian chuan bamboo diversity-ah sâng hle mah ila, bamboo development atan technology lamah te, industrial infrastructure leh thildangahte ṭan lak a ngai nasa a ni, a ti a. Kan rama awm, Melocanna baccifera chuan bamboo based production mamawh a phuhruk zawh loh dante sawiin, heng avang hian sawrkar chuan large size bamboo species-ah ṭan a la a ni a ti a. Nimin Roundtable discussion hian rah ṭha tak chhuah se, sawrkar hmalakna ti phuisui a, hmasawnna tur thurawn pe thei, hmun hrang hrang aṭanga kal khawmte chu sawmin, duhsakna a hlan a ni.

JC Ramthanga, Addl. Chief Secretary chuan kal khawmte lawmna thu a sawi a, Dr Elizabeth Saipari, Director, Horticulture & Mission Director, State Bamboo Mission chuan Mizorama Bamboo Mission kalpui dan a sawi a, Dr.Carmelita Lalchhanhimi Pachuau chuan Role and Potential of Bamboo a sawi bawk a, Dr.Avanish Kumar Srivastava, Director, CSIR-AMPRI hnen aṭangin Bamboo Composite Research and Application in the Development of North East tih ngaihthlak a ni bawk a ni.

Roundtable on Bamboo hi L.Lalhmingmawia Pachuau, Jt. Director, Horticulture Department chu moderator niin, Video Conference kaltlangin N.Delhi, Tamil Nadu leh hmundang aṭangin bamboo sector-a thawktu dangte an tel bawk a, Panel-ah hian CSIR, National Bamboo Mission, CSIR-AMPRI, Manipur University, Tripura Bamboo Mission etc. aṭangin an tel a, C.H Lalmuanpuia, Joint Director chuan he hun hi lawmthu sawiin a khar a ni.

Leave a Reply

This site uses Akismet to reduce spam. Learn how your comment data is processed.