Skip to content
Home » Chanchinthar » Mizoram Legislative Assembly kum 50 tlin denchhenin Special Assembly nei

Mizoram Legislative Assembly kum 50 tlin denchhenin Special Assembly nei

Nimin chawhma khan Mizoram Legislative Assembly-in kum 50 a tlin champha phak denchhenin Special Session neih a ni a, hetah hian Governor Hari Babu Kambhampati leh Chief Minister Zoram-thanga-ten Golden Jubilee puala thuchah a sawi a i.

Governor chuan Mizoram Legislative Assembly kum 50-na lawman hun ropui takah a bik taka session buatsaihah thu a sawi thei chu vannei a inti hle tih a sawi a, Andhra Pradesh state-ah MLA leh MP angin mipui rawng a lo bawl tawh ṭhin thu leh MLA leh MP hlui a nih tawh avanga he hun hlutzia a hriatthiam thu leh mawh-phurhna pawimawh tak a chang thei chu ropui a tih thu a sawi a ni.

May 10, 1972 khan Mizoram UT sawrkara MLA 33 awmna Assembly ṭhutkhawm hmasa ber chu neih a nih thu a sawi a, hemi ni aṭangin hian Mizoram Legislative Assembly chuan hmalam pan zelin nasa takin hma a sawn tawh a, kum 1987-a state a nih aṭangin MLA 40 a nei leh a, tunah chuan hma a sawn tawhin Mizoram Assembly chhunga ṭhutkhawm neih leh an rorelna kalpui dante pawh a felfai ṭhin em avangin state dangte mai ni lovin Parliament tan hial pawh entawn tlaka mawi a ni a ti.

Mizoram chhungah Hnam hrang hrang leh sakhaw hrang hrang betute chu inngeihtlang takin an awm mek a, Mizoram hmabak a êng a, Bangladesh leh Myanmar-te nen ramri kan inṭawm avangin Asia chhim leh Asia chhimchhak ramte leh India inkalpawhna kan ni chho mek a, KMMTTP leh rel kawngte a puitlin hunah phei chuan thawhsenloh thawh tur a awm dawn tih a sawi a, tuna kan mamawh chu kawlpetha hnianghnar tak siam theihna kan neih anga siam te, khualzinmite hipna ṭha tak tak kan neihte hmanga sum haihluh dan ngaihtuahte leh Health sector bika ṭan lak zual te a ni ti.

Special Session hawngtu Chief Minister, House Leader ni bawk Zoram-thanga chuan India ram zalennain kum 75-na hmel a hmuh kumah Mizoram Legislative Assembly kum 50-na tlin kan lawm thei chu a lawmawm tak zet tih a sawi a. State dangte Assembly aiin la naupang zawk deuh mahse House chhunga rorelna kalpui a nih ṭhin danah na na chuan state upa zawkte entawn a ni mek a, he dinhmun kan thlen theihna chhan hi Pathian kaihhruaina avang a ni a ti a, mihring nuai tlemte chenna state hi India ram mihring tluklehdingawn aia tam mipui te hnenah hian “ remna leh muanna” zirtir turin Pathianin min ruat a ni a ti bawk.

Special Session-ah hian House a thusawi tura a bik taka sawm a nih angin Assam Legislative Assembly Speaker Biswajit Daimary pawhin thu a sawi a, Mizoram mipuite nen undivided Assam-ah an awm ho ṭhin thu te, Mizoram aṭangin MLA hmasa ber 3-te pawh an chhuanawm ṭhin hle nia an hriat thu te a sawi a. Mizoram a indan hnuah Mizoram Legislative Assembly in kum 50 hmel a hmu chu Assam Chief Minister leh mipuite pawhin an lawmpui hle tih a sawi a, Mizoram Legislative Assembly-ah session entawn tlak takin kalpui a ni thin chu lawmawm a tih thu a sawi a, India ram British-in a awp lai pawha British laka zalenna sual tawh in ni a, he hunah hian Lalnu Ropuiliani lo huaisen zia kha ka dawi lang duh a ni a ti a, ramri chungchangah pawh Mizoram Chief Minister leh Assam Chief Minister-te an inbe pawp reng a, hun reiloteah inremna ṭha tak a awm theih a beiseiawm tawh hle a ni a ti bawk.

Speaker Lalrinliana Sailo-in lawmpuina thuchah Lok Sabha Speaker Om Birla rawn thawn chu a chhiar leh a, hemi hnu hian Political party tin te aiawha thusawi tura ruatten thu an sawi a, Mizo National Front Party aiawhin Deputy Chief Minister Tawnluia’n thu a sawi hmasa ber a, Zoram People’s Movement Party aiawhin Lalduhoma, MLA, Indian National Congress Party aiawhin Nihar Kanti Chakma leh Bharatiya Janata Party aiawhin Dr BD Chakma-ten thu an sawi a, hemi hnua hian Speaker chuan tiamchin awm lovin session chu a khar zui a ni.

Nimina Assembly Special Session-ah hian Speaker hlui te, MLA hlui te, Chanchinbumite leh sawrkar hnathawk zinga Head of Department chin leh a chunglam te sawm an ni a, he hunah hian tuna Home Minister Lalchamliana, Speaker lo ni tawh nena tiamin Speaker hlui pali 4 House-ah ṭhuttir an ni a, Speaker hmasa ber Dr. H.Thansanga, Dr.Kenneth Chawngliana leh R.Romawia-te chu Speaker Pu Lalrinliana Sailo veilam, MLA-te ṭhutna sirah ṭhuttir an ni a, Ex-MLA te pawhin Speaker veilam hung pawnah ṭhutna an rem bawk a, Ex-MLA zingah hian State MLA batch hmasa ber aṭangin K.Sangchhum leh Sapliancheuva-te pawh an tel a ni.

Special Session neih zawhah hian Session Hall-ah a huhova thlalakna neih a ni a, hemi hnu hian Governor chuan Golden Jubilee hriatrengna lung phum hawngin Golden Jubilee Exhibitions a fangkual leh a, Jubilee lung hawnna neih zawh hian Jubilee dar vuak neih leh a ni a, nizan lamah khan Conference Hall, Assembly Annexe-ah Governor-te nupa pualin Cultural Programme buatsaih a ni a, Chief Minister leh Council of Ministers, Assam Speaker te, MP te, MLA te, Ex-MLA te, High Official sawmbik, NGO hruaitute an tel a ni.

Leave a Reply

This site uses Akismet to reduce spam. Learn how your comment data is processed.