Mizoram Pollution Control Board (MPCB) chuan Mizoram hmun hrang hranga kawngpui laih hna thawktu, National Highways and Infrastructure Development Corporation Limited (NHIDCL) chu ‘Show cause notice’ an pe a, an hnathawh tihtawpsak an nih lohna tur chhan leh environmental compensation an ṭhin lohna tur chhan sawifiah turin an hriattir.
MPCB member secretary C Lalduhawma sawi danin, MPCB in show cause notice a pêk nachhan ber chu kawngpui laih hna an thawh a an leivung paih dan phung mumal loh vang a ni ber a, chumi chungchangah chuan MPCB-in complaint pawh an lo dawng fo tawh ṭhin a, hemi chungchangah hian MPCB chuan NHIDCL chu an project awm dan leh an project len dante MPCB-ah submit turin vawi 2 an lo hriattir tawh a, chhanna erawh NHIDCL lam hian an pe ngai lo tih a sawi a, “An hmalakna ah environmental clearance ngai niin kan hria a, an neilo niin kan hre si a, chumi vang chuan an project len zawng hriat a ngai a, mahse min chhang duh lo, central lam an nih avangin an ngeng ve deuh pawh a ni mai thei,” a ti.
MPCB member secretary chuan tun a show cause notice an pek chuan Mizoram hmun hrang hranga an hmalakna a huap vek tih sawiin, show cause notice an pek chu an hmu thuai turah an ngai tih a sawi a, nimin, May ni 25 aṭanga chhiar a ni 7 chhung ngei a insawifiah turin MPCB chuan NHIDCL an hriattir tih a sawi bawk.
-Zalen