Lawngtlai District-a tlawmngai pawl lian ber, Young Lai Association (YLA) chuan Zirtawpni khan General Conference neiin, heta an thurel zingah North East India-a State danga Autonomous Council-in thuneihna an neih ang Lai Autonomous District Council-in a neih ve theihna tura hmalak nise an ti.
Hrileng avanga mumal taka Conference neih theih a nih loh hnuah, YLA General Conference vawi 29-na chu Zirtawpni khan Central YLA Hall, Lawngtlaiah nghah a ni a, Conference-ah hian Branch tin aiawh mi 6 ṭheuh an tel thei a ni.
YLA Conference Rorel-a an thu Passed langsar zual zingah LADC huam chhung-ah Environment humhalh te, Tui hna tlem zela lui hum-halh leh thing leh mau hum-halh chungchang-ah CYLA-in hma la se tih te, Lawng-tlai District-ah Institution of Rural Development Training Centre a awm theih nan CYLA-in hma la rawh se tih leh kum 2023 YLA Golden Jubilee ropui taka hman nise tihte an passed a, kum 2022-2023 chhunga YLA Kumpuan atan ‘Ram leh Hnam Humhalh’ tih thlan a ni a, YLA hruaitu hlun mi 17 hnenah Chawimawina Thuziak hlan an ni a, Life member mi 3 hnenah thuziak hlan a ni bawk. YLA Dan bu, Lai ṭawnga ziak chu YLA dintu F.Lalhulh, Sangau chuan a tlangzarh bawk.
CYLA hnuaiah hian YLA Branch 115 awm mekin, Sub-Hqrs 7 leh Group YLA 7 an awm a. member mipa 36540 leh hmeichhia 19820, an vaiin members 56,360 an awm mek a ni.