Premier League season khâr zan, nizan khan Manchester City chuan hun tawp dawn lamah minute 5 chhunga goal 3 an thun hmangin Aston Villa chu 3-2-a hnehin season 5 chhunga a ṭum 4-na turin Premier League champion no mawi an chawi leh.

Nizana Premier League inkhela ngaihven hlawh ber pahnih zinga pakhatah hian Aston Villa chuan Matty Cash leh Philippe Coutinho-te goal hmangin 2-0-in minute 76 thleng City lakah hma an hruai a, hetihlai hian inkhel ngaihven hlawh pakhat zawk, Liverpool leh Wolves-te inkhel chu 1-1-in an in-draw ve mek. Manchester City hi chak lo-in Liverpool hi chak se chuan Liverpool hi Premier League champion an ni dawn a ni.

Aston Villa laka 2-0-a City an hnufual lai hian Liverpool chuan champion beiseina thar an nei a, hetihlai hian City pawh hian Villa hi lehthal ngei tumin an bei ve bawk. Minute 76-ah City tan Ilkay Gundogan chuan goal a thun ta nge nge a, minute 2 chiah a liam tihin Rodri chuan City si phurh an sût zo lehnghal a, mahse City tan champion turin draw ringawt a tawk lo a, an chak zo lo a, Liverpool an chak a nih chuan Liverpool-in an la champion khalh thei tih an hria a, chak ngei an tum chhunzawm zel a, goal hnihna an thun aṭanga minute 3-na lekah Gundogan chuan City tan goal a thun belh leh a, hei bak hi goal dang lut lovin City chu 3-2-in an chak ta a, Liverpool pawh Wolves lakah 3-1-in chak ve bawk mahse awmzia a awm ta lo; Aston Villa boss Steven Gerrard chuan a club hlui Liverpool-in title an chawi theihna atan City a dang tluan thei ta si lo a, City hi an champion ta a, City tana a inlan hnuhnunna berah Fernandinho chuan Club tana a ṭum 8-na atan top flight title a chawi thei ta hlauh a ni.

Liverpool tan hian Sadio Mane, Mohamed Salah leh Andy Robertson-ten goal an thun a, Wolves goal neih chhun hi Pedro Neto thun a ni.

Leeds an tal chhuak
A hniam lamah Leeds chu season khâr ni-ah relegation zone aṭangin an tâl chhuak hlauh a, 2-1-a Brentfort hnehin Premier league khel chhunzawm turin an him thei a, kum 11 kalta khan hetiang hian Wigan chu season khar ni-ah an him hlauh a, hemi hnua hetiang ti thei leh hmasa ber chu Leeds hi an ni. Hetihlai hian relegation zone pawna awm chunga inkhel, Burnley erawh Newcastle lakah 1-2-in an tlawm avangin season tharah Championship lamah an tla thung dawn a, an hmaah hian Norwich leh Watford chu an lo tla sa tawh a ni.

Top 4-ah awm lo Arsenal
Top 4-a season khâr theihna chance nei, Arsenal chuan 5-1-in Everton sawp mahse Spurs chu 5-0-a Norwich laka an chak ve tho avangin top 4-ah an awm phak ta lo a, Arsenal hian Manchester United nen Europa League an khel ang.

Mimal chawimawina
Mohamed Salah chu 2021/22 Castrol Playmaker of the Season award hlan niin, ani hian assist 13 a nei a, hetihrual hian Tottenham forward Son Heung-min nen goal 23 thunin Golden Boot an dawngdun bawk a, Son hian season khar ni hian goal 2 thunin, Salah hian goal 1 a thun thung a ni.