Nimin zing dar 9:30 khan BJP Mizoram Pradesh President Vanlalhmuaka, Dr. BD Chakma MLA, State Vice President bakah hruaitu dang te’n India Ram President Ram Nath Kovind hmuin Mizoram hmasawnna tur Memorandum an thehlut.
President chuan Mizoram BJP hruaitute a hmu chu lawmawm a tih thu hrilhin an thu theh luh pawh a ṭul anga bawhzui a tum thu a lo hrilh a ni.
Memorandum thehluh bakah hian Vanlalhmuaka chuan president hnenah Mizoramah PM Scheme hrang hrangte chu a nihna tur anga hman leh kalpui a nih loh thu leh Mizorama sawrkarna chelh mek te’n an Party hamṭhat nan a an hman ṭhin thu a hrilh a ni.
India President hnena Memorandum thehluh te chu Zoram Medical College tihchangtlunna (upgradation) tur te, thingtlangah hriselna kaihhnawih bungraw ṭha zawk dah te, Bairabi – Sairang rel kawng siam mek zawh thuai a nih theihna tur te, India leh Bangladesh ramri hungna siamṭhat leh ennawn te, Indo-Bangla ramri-a border economy road siamṭhat leh, Land Custom Station leh Border Haat siam zawh chungchang te leh Autonomous District Council-te thuneihna thuamchak dan turte a ni.