Nimin khan Ramdin-liani, Director, Food Civil Supplies & Consumer Affairs chuan Serchhipa eirawng-bawlna gas (LPG) a mamawhtute ina dahsakna tur kalphung (Home Delivery System) bul ṭanna a hawng.
MIZOFED leh Serchhip District Consumer Association ṭangkawpte buatsaiha P&E Veng YMA Hall-a Gas Home Delivery system hawnna inkhawm hi MIZOFED Chairman, K.Rothangpuia chuan a kaihruai a, khuallian Ramdinliani chuan, ram chhung khawpui dangah Home Delivery System mai ni lo, Pipeline Connection-te hial hmanga eirawngbawlna gas an lak tawh laia Serchhip P&E Veng bik tana Home Delivery System hawnna hun hman a la ni ve chauh chu lehlam zawnga ngaihtuah chuan hmabak kan la ngahzia tilangfiahtu a tling a ni, a ti a, Delivery hnate phei chu Mizote thiam chi tak hna niin a hriat a, kan tih theih loh bikna chhan tur hi a awm reng reng lo a ni, a ti a. Tun hnaiah Covid-19 hrileng avangin LPG mai ni lo, chawhmeh leh eitur hrang hrang home delivery-a kalpui lo thatzia leh tangkaizia pawh kan hmu ṭheuhvin a rinawm a, khatiang tho khan Gas pawh kan tithei ngei ang tiin, Delivery System chu zau zawka kalpui theih a nih a beisei thu a sawi a, Delivery Charge man atana bithliah ₹70 chu sâng deuh angin lang mahse ₹70/- hi fixed bur a ni lo a, a sân theihna ber rate (Maximum Delivery Rate) zawk a ni a, Company, Distributor leh Consumer te, a tu a te mah an chhiat bik lohna tur atana duan a ni, a ti a, Home Delivery System chuan ṭhalaite tan hna a siam belh ngei a rin thu pawh a sawi a ni.
He hunah hian H.Zonuntluanga, President, District Consumer’s Association, Serchhip hnen atangin LPG chungchanga mipuite tana District Consumer Association-in hma a lo lak tawh dan tlangpui te, Serchhipa LPG Home Delivery a kalpui a nih theihna tur atana Online Booking tihdan an lo inzirtir tawh thute sawiin, sawrkarin delivery rate a bituk zat bur 1 zela ₹70 chu sang an tih deuh thu leh, mahse hun lo kal zel turah tun aia rate tlawm/hniam zawk a kalpui chhoh theih an beisei thute a sawi a ni.
FC Malsawmtluanga, Branch Manager, Mizofed Serchhip pawhin thusawiin, MIZOFED Managing Director ten rem an tih angin Home Delivery kalpui hna hi vengchhung chinchang hre ber tura ngaih Serchhip P&E Veng Branch YMA-ten an kutken ṭan nghal tur thu a tarlang ni.
Serchhip a LPG Home Delivery hawnna inkhawmah hian DCSO Serchhip & Legal Metrology Department aiawh te, District Consumer Association leh P&E Veng VC leh YMA aiawhte bakah chanchinbu mite an tel a ni.