Zothlifim Logo
Loading ...

Serlui tuikhuah kam hal chungchangah Environment, Forests & Climate Change department Kolasib chuan mawhphurtu zawngchhuak turin FIR an thehlut a, Kolasib bawrhsap John LT Sanga pawhin tuikhuah kam tichereu zawnga hmalakna hmuh tur a awm leh ṭhin chu pawi a tih thu a sawi.

Nimin khan Kolasib DC Conference Hall-ah Kolasib District Level Fire Prevention Committee chu ṭhukhawmin 2022 chhunga hmalakna hrang hrang an thlirlet a, he hunah hian kumin chhungin kangmei ṭum 312 a chhuah tawh thu leh heng zinga ṭum 300 chu lo hal vang a ni a, a dang ṭum 12 chu ram kang a nih thu tarlan a ni.

Meeting kaihruaitu district bawrhsap John LT Sanga, District Level Fire Prevention Committee chairman ni bawk chuan ram leilung hausakna humhalh chu mi tin mawhphurna a nih thu leh tuna hmalakna chuan nakin hun thui tak a hril dawn avangin tihtak zet a ngaituahna sen a ṭul thu a sawi a, kawlphetha siam chhuah nana lui khuahna kam ti chereu zawnga hmalakna hmuh tur a awm leh ṭhin chu pawi a tih thu leh dan anga hmalakna a nih tur thu a sawi a, ram leilung hausakna venhim pawimawh zia inzirtirna uar zawk a kalpui a ṭul thu a sawi bawk.

Member Secretary Margaret Lalramchhani, IFS, DFO chuan 2022 chhunga kangmei ven kawnga hmalakna kalpui dan report a pe a, Forest Survey of India tarlan danin ṭum 312 kangmei chhuakah hectare 464.99 chu lo hal vang a nih thu leh hectare 4.73 chu ram tihkan vang a nih thu a sawi a, Serlui tuikhuah kam kangmei chhuaka mawhphurtu dapchhuah a nih theih nan Kolasib Police Station-ah FIR thehluh a nih tawh thu a sawi.

Hmunphiah chingtuten a hun taka ram an hal hman ṭhin loh avanga harsatna an tawh dan, meeting-ah hian sawiho a ni a, lo neia eizawng chhungkaw 1726-ten ṭin 3170 a zau lo neihna tur an hal thu leh hunbi tuk chhunga lo hal hman lo, a hranpa a dilna theh lut mi 40 an awm thu tarlan a ni bawk. Serlui leh Tuirial Hydel Project tuikhuah kam chereu mek siamṭhat leh humhalh a nih theih nan hmalak dan tur sawi ho a ni a, dan lova huan leh lo siam lui an awm a nih chuan hremna pek a nih tur thu tarlan a ni.