Zothlifim Logo
Loading ...

Siaha District Election Officer, Lalsangliana, Mara Autonomous District Council Election 2022-a Returning Officer ni bawk chuan Supply Minister K.Lalrinliana chu Election Model Code of Conduct bawhchhia puh a nih chungchangah insawifiah tura hriattirna (Show Cause Notice) a pe a, Supply Minister hian insawifiahna a siam tawh a ni.

1-25 MDC Constituencies (MADC 2022) RO-in Supply Minister hnena insawifiah tura lehkha a pekah chuan ni 3.5.2022 (Thawhlehni)-ah Tipa Supply Inspector kaltlangin Theiva khuaah buhfai ṭhahnem tak a dahtir tih report/complaint a dawn thu a tarlang a, hemi avanga a chunga dân anga hremna lekkawh a nih lohna chhan tur ni 10.5.2022 (Thawhlehni) chawhma dar 11:30 hma ngeia a hnena ziaka thehlut turin a hriattir a ni.

Supply Minister hian nimin khan insawifiah tura tihna lehkha hi chhang nghalin, a insawifiahna lehkhaah chuan, “Theiva khuaah hian Adhaar Card nei lo leh Aadhaar link loh avangin chhungkua tam takin an ration dawn ṭhin ai tlem an dawn thu leh, an ration dawn an kham loh thu an rawn thlen a. Hengho ang hi Mizoram hmun dangah pawh an awm nual avangin special allotment retailer kaltlangin tihsak ṭhin an ni. An harsatna an rawn thlen hian a bialtu Inspector hi sawrkar thu awmsa anga hma la tura hriattir a ni. Amaherawhchu Election Code of Conduct hmanlai a nih angin inthlan zawh hmaa lo pe chhuak lo tura hrilh hriat a ni a, la pek chhuah a ni lo,” tiin a ziak a ni.

Vawiina MADC-a member of district council (MDC) inthlanpui neih turah hian Model Code of Conduct bawhchhiaa inpuhna complaint 3 a lut a, hengte hi BJP-in an thehluh vek a ni a, heng zinga Sports Minister Robert Romawia Royte fapa-in Thiahra field zauhna tur sum pein, election dan a bawhchhia nia sawia complaint an thehluh chu Thiahra Joint NGO leh all party joint meeting-in dan bawhchhiatna a awm lo nia sawia complaint hnuhkir an phut hnuah hnuhkir a ni thung a ni.