Serchhip District ṭhalai, state danga hnathawka chhuak, Covid-19 hripui leng avanga lo kirte tana eizawnna pêng hrang hrang inzirtirna (Livelihood Generation for returned Migrant Workers due to Covid-19) chu nimin khan Serchhip District Addl. DC Lalmuansanga Ralte chuan Serchhip District Panchayati Resource Centre-ah a hawng.
Hawnna inkhawm tawi kaihruaitu Lalzikpuii, MCS, SDO Sadaar chuan thuhma sawiin, he training hi neih tura ruahmanna rei deuh tawh mahse Covid-19 hripui lengin Serchhip district a chim rei avangin an nei tlai ta hlek tih a sawi a, hetiang training hi district zawng zawnga neih tura Mizoram sawrkarin a duan a nih thu leh, district tinah hian Core Committee pawh din vek a nih thu a tarlang a ni.
He inzirtirna hawngtu, Lalmuansanga Ralte chuan thiamna hi theihna min petu, mi ṭangkaia min siamtu, kan nun tihlutu a ni a, thiamna leh hriatna ngainaa theihtawp chhuaha zawngtute chu reiloteah an ṭhiante zinga mi hlawhtling, puitling hmasaah an lo chhuak mai ṭhin a ni, a ti a, he training-ah pawh hian eizawnna tlak ṭhiau thiam thil chi thum inzirtir a ni dawn a, a ti mai mai lote tan chuan eizawnna neih zuinatlak a tling ngei ngei dawn tih a sawi a, chuvang chuan a zir tura thlante chu ti mai mai lo turin a chah a ni.
Training Co-ordinator F.Lalnisai pawhin he training nei tura hma an lak dan tlangpui sawiin, he training-a tel duhte zawnna chu chanchinbuah Advertisement chhuaha an zawn thu a sawi a, amaherawh chu an beisei zat dilna an hmu lo tih sawiin, ṭhalaite tana inzirna ṭangkai tak a nih si avangin YMA leh MHIP hruaitute phungbawmah sawmin, state danga hnathawk lo kir (migrant workers) ni chiah lote pawh engemawzat an teltir ta tih a sawi a, zir tur chu chi thum thlangin, Cement Mistiri, ei leh in siam (Food Processing) leh vawk vulh (Piggery)-te an ni a, Cement Mistiri-ah hian seat 40 awmin SIRD & PR mithiamten zirtirna an pe ang a, Food Processing ah hian Seat 20 awmin Lalhmangaihzuali, M.Sc (Food & Nutrition) leh K.Lalmalsawmi, SMS, KVK-ten zirtirna an pe ang a, Piggery-ah hian seat 20 awmin AH & Vety, Serchhip district mithiamten training an pe thung dawn a ni.
Hawnna inkhawmah hian Er. Lalthlansanga, Core Faculty, Rural Engineering, SIRD & PR leh Kawlṭhuama, President, Sub- Hqtrs YMA-ten thu an sawi bawk a ni.