French Open khelh chhoh mekah world number one Iga Swiatek chuan awlsam taka Lesia Tsurenko hnehin second round a lût a, hetihlai hian Grand Slam champion ṭum 4 lo ni tawh Naomi Osaka erawh first round-ah a tla nghal.

Swiatek hian minute 54 chhung lekin Tsurenko hi 6-2, 6-0-in a hneh a, Rolland Garros-a kum 2020-a champion tawh, kum 20-a upa Swiatek hi a zawnin match 29 chhung a chak ta a ni.

Hetihlai hian Osaka erawh chu Amanda Anisimova lakah 7-5, 6-4-a chak lovin a tla nghal a, Osaka hian Anisimova hi January thlaa Australian Open title humhim a tumna kawngah pawh khan a lo hneh lo tawh a, 2019-a French Open semi-finalist Anisimova hian Donna Vekic a hmachhawn leh ang.

Mipa lamah Carlos Alcaraz chuan hnehna nen bul ṭanin, set hloh miah lovin Juan Ignacio Londero a paltlang a 6-4, 6-2, 6-0 in a chak a, kum 19 mi hian tun season-ah trophy 4 lai a chawi tawh a ni.

Third seed Alexander Zverev pawhin 6-2, 6-4, 6-4-a Sebastian Ofner hnehin first round a lut a, second round-ah Dusan Lajovic leh Sebastian Baez inkhela chak zawk zawk a hmachhawn ang.

Mipa lamah hian tla zingah Dominic Thiem a langsar ber a, Hugo Dellien lakah 6-3, 6-2, 6-4 in a tlawm a, a zawnin game 10 chhung hneh a nei ta miah lova rankings-ah pawh 194-na a ni tawh a ni.