Nimin khan Tripura chief minister thar atan BJP state president Manik Saha chu lakluh a ni a, Governor SN Arya chuan Raj Bhavan, Agartala-ah rinawmna thu tiamtirin a laluh a ni.
He hunah hian chief minister bangta Biplab Deb bakah BJP MLA leh state minister-te an tel a, central aṭangin union minister Pratima Bhoumik pawhin a rawn hmanpui a ni.
Lakluh a nih hnuah Saha chuan, “Tripura mipuite tan prime minister Narendra Modi hmathlir hlen turin thawhho puiah ka sawm che u a, dan leh thupek lam kan vil ngun zual ang,” a ti.
State chief minister atan lakluh tak Saha hi surgeon doctor King George Medical College, Lucknow aṭanga graduate a ni a, kum 2016 ah BJP a zawm hma hian Congress member a ni ṭhin a. Kum 2020 aṭang khan Tripura state BJP president mawhphurhna a chelh ṭan a ni.
Tripura chief minister bang ta, kum 50 mi Deb hi Delhi-ah union minister Amit Sahah leh BJP president JP Nadda te nen an inkawm hnu lawkah an state Governor SN Aryabanna hnenah Inrinni khan banna hi a thehlut a, “Kum 2023 ah election kan hmachhawn leh dawn a, party chuan helai hmuna mawhphurhna la tur hi a duh a ni. Inpumkhatna a ngheh chauhin sawrkar hi din theih a ni,” tiin party lamin a koa mawhphurhna an dahte a sawi.
Kum 2018 MLA inthlanpui khan BJP chuan Tripura-ah hian sawrkarna siamin Deb chu chief minister atan ruat a ni a, kum 25 chhung zet Left Front in an lo awp tawh Tripura-ah BJP in thuneihna an chang veleh a ni. Deb hian CM aṭanga a bân chhan hi sawi lo mahse a MLA zingah amah duhlotu an awm vang nia sawi a ni.