Mizoram aṭanga Tripura a tlanchhia Bru voters mi 207-te chu Mizoram Electoral Roll aṭangin paih an ni tawh a, midang pawh paih chhunzawm zel tum an ni.
Election department thawktute hnen sawi danin Mizoram Electoral Roll aṭanga paihte hi Hachhek bial aṭangin voter 67, Dampa bial aṭangin voter 9, Mamit bial aṭangin voter 70, Tuirial bial aṭangin voter 44, Kolasib bial aṭangin voter 7, Serlui bial aṭangin voter 8 leh Thorang bial aṭangin voter 2, an vaiin voter 207 an ni.
Election department thawktute sawi danin, Tripura sawrkar chuan Bru pem thla mi 1,090-te chu Tripura E/Roll-ah an thun tawh niin an sawi a, tunah hian Tripura E/Roll a inthun dil voter 1,786 an awm leh mek niin an sawi. Tripura sawrkar hian E/Roll-a an thunte hming hi Mizoram sawrkar a rawn hriattir a, chumi hmang chuan Mizoram sawrkarin roll aṭangin an hming hi a lo paih ṭhin a ni.
Chief Electoral Officer, Mizoram chhinchhiah danin kum 2018 MLA inthlan dawn khan Tripura-a tlanchhia Bru, Mizoram electoral roll-a hming chuang (vote nei) hi 11,232 an awm a ni.
-Zalen